Kreu demokrat Lulzim Basha u shpreh sot për 5 prioritetet më të rëndësishme që kërkojnë zgjidhje të shpejtë.
Basha ishte sot në Thumanë, për të ndjekur nga afër operacionin e kërkim-shpëtimit të banorëve të mbetur nën rrënoja dhe për t’u takuar me të mbijetuarit.
Ndërsa falenderoi ekipet e shpëtimit që kanë ardhur nga vende të ndryshme për të ndihmuar në gjetjen e personave që gjenden nën rrënoja, Basha tha se prioritet i parë mbetet nxjerrja e qytetarëve nga rrënojat.
“Së pari është prioriteti i shpëtimit dhe nxjerrjes së viktimave nga rrënojat.
Së dyti, dhjetëra familje që kanë mbetur pa strehë kanë nevojë për mbështetje reale. Nuk mund të qëndrojnë në çadra. Menjëherë duhet bërë vendosja e tyre në apartamente dhe gjendja e jashtëzakonshme bën të mundur që qeveria të alokojë fonde. Unë e vlerësoj mbështetjen e hotelerierëve, por kjo nuk është e mjaftueshme. Ato familje kanë nevojë për strehë dhe mbështetje financiare.
Imagjinoni, diçka e vogël të ndodh dhe të humb sigurinë, ndërkohë që këto familje…
Unë i falënderoj të gjithë, forcat tona të armatosura dhe Policinë e Shtetit, që punonin me duar, as doreza nuk kishin, ndërkohë që pamë ekipet e tjera që nga Kosova që ishin të pajisur.
Së treti, ngritja e një strukture të mirëpajisur duhet të trajtohet si një emergjencë.
Së katërti, duhet të merren masa të menjëhershme për evidentimin e objekteve në rrezik. Në qoftë se do të ishte ndjekur procedura e sigurisë, këto dy pallate që janë vendet e katastrofës më të madhe njerëzore, duhet të ishin nxjerrë jashtë përdorimit.
Nuk kemi mundësi të përsërisim tragjedi të tilla për shkak të paaftësinë apo neglizhencës.
Duhen marrë edhe masa të shpejta energjike për të luftuar stresin, shokun dhe kjo bëhet me informim, jo me propagandë”, tha Basha.
