Kreu demokrat Lulzim Basha i ka drejtuar një thirrje qeverisë që të shpallë gjendjen e emergjencës pas tërmetit të fortë të regjistruar në orën 04:00 të mëngjesit të sotëm, e shoqëruar nga disa dhjetra pasgoditje të tjera.
Basha, në emër të PD-së, ka shprehur ngushëllimet më të thella ndaj familjeve që kanë humbur të afërmit e zemrës, dhe u urojmë shërim sa më të shpejtë të lënduarve.
“Ne po bëjmë gjithçka që t’i gjendemi pranë çdo shqiptari në këtë fatkeqësi dhe tronditje të madhe të përbashkët.
Zero interpretim politik nuk kam sot, përveçse një thirrje qeverisë që të shpallë menjëherë gjendjen e emergjencës, për të mjekuar të dëmtuarit, për të inventarizuar dëmtimet, për të mirëmenaxhuar panikun dhe pasojat e tërmetit.
Të gjithë në këmbë, solidaritet të pakursyer dhe të pakushtëzuar! Si vëllezër dhe motra të një gjaku, të një kombi, në krah te njerëzve që kanë humbur të afërmit e shtrenjtë, në krah të qytetarëve të lënduar që janë ende të tronditur dhe të dëmtuar rëndë.
Respekt, mirënjohje dhe mbështetje totale mjekëve, infermierëve, punonjësve të policisë, ushtarakëve, personelit të strukturave të emergjencës, kompanive që po ndihmojnë me çfarë munden për të përballuar këtë situatë të rëndë.
Të gjithë bashkë si një familje e madhe, pa asnjë dallim, do t’ia dalim!”, tha Basha.
Nga tërmeti i sotëm humbën jetën 7 persona, ndërsa disa qindra të tjerë janë plagosur ose lënduar.
