Një tërmet 6.4 i shkallës Rihter, me epiqendër në Adriatik, por që është ndjerë në Durrës, Krujë, Tiranë, Kavajë, Lezhë, Lushnje, Fier, ka shkaktuar të paktën 6 viktima dhe disa qindra të plagosur.
Gjithashtu dëme të shumta materiale janë regjistruar kryesisht në Durrës dhe Thumanë, aty ku gjendja paraqitet dramatike, për shkak të numrit të personave të mbetur nën rrënoja.
Nga të dhënat zyrtare raportohet se të paktën 22 persona janë nxjerrë nga rrënojat në Durrës dhe Thumanë.
Referuar burimeve zyrtare, 1 nga personat që ka humbur jetën është në Kurbin, dy janë në Thumanë dhe 3 në Durrës, dy prej të cilëve janë gjetur të pajetë si pasojë e shembjes së një hoteli.
Në terren për të përballuar situatën janë angazhuar mbi 1900 forca policore, ndërkohë që në ndihmë të tyre janë edhe ato të reparteve ushtarake.
Situata paraqitet dramatike veçanërisht në Durrës dhe Thumanë, ku regjistrohet edhe numri më i lartë i personave që kanë humbur jetën, por edhe i ndërtesave më të dëmtuara.
Çdo pas lëkundje tërmeti, pas atij të regjistruar në orën 04:00, përbën rrezik për ndërtesat që janë dëmtuar nga tërmeti i fortë.
