Kryeministri Edi Rama akuzoi sot Prokurorinë se nuk ka vepruar në 87 raste ndaj autorëve të arrestuar nga policia për vepra penale të rënda. Rama tha se për të luftuar krimin dhe korrupsionin duhet nga njëra anë pushteti ekzekutiv dhe politik dhe në anën tjetër prokuroria dhe gjykatat.
Sipas tij, gjykatat kanë dhënë dhjetra vendime pafajësie ndaj personave të arrestuar dhe akuzuar për krime të rënda, të cilët pasi janë liruar nga gjykatësit kanë kryer prapë krime.
“I kanë marrë të prangosur dhe me akuzë nga prokuroria, dhe e kanë nxjerrë nga dera tjetër me pistoletë në dorë për të kryer krimin e rradhës”, tha Rama.
Kreu i Qeverisë duke folur për reformën në drejtësi tha se kjo që po ndodh është diçka e jashtëzakonshme.
“Unë nuk e di se çfarë prisnin njerëzit nga kjo reform, por duhet t’i sqarojmë se nuk të fut në burg qeveria, Parlamenti apo shumica qeverisëse, por të fut në burg drejtësia.
Po reformojmë sistemin, duhet durim, unë e kuptoj që durimi është malli më i shtrenjtë.
Tani janë krijuar kushtet për t’a bërë, pasi deri dje oligarkia e sistemit të drejtësisë kishin gjithçka në dorë, ishin milionerë që bënin ligjin.
Vetting është për të pastruar, jo për të dënuar. Po pastrohet Pallati i Drejtësisë nga llumi dhe këta që dalin si të papunë sot, do të kthehen nesër si të pandehur”, tha Rama.
Lidhur me atë që e konsideroi si organizata kriminale në sistemin e drejtësisë, ku përfshin “gjyqtarë e prokurorë, që e dinë që nuk kalojnë vettingun dhe janë kthyer në KÇK’, Rama tha se rasti e solli që ai prokurori i Durrësit të gjendej në një makinë me një kriminel, dhe në bagazhin e makinës të gjendeshin dokumentet e vjedhura të prokurorisë së Durrësit.
“Po ne çfarë duhet të bëjmë, duhet të presim Vetting-un për “kap ça të kapësh”? KÇK është një kancer në sistemin tonë të drejtësisë.
Çdokush nga këta dhe familjarët e tyre duhet të provojë para gjykatës që shtëpinë, biznesin, makinës, burimin e pasurisë së tyre, pra ligji anti-mafia do të veprojë mbi ta”, tha Rama.
Në vijim ai shtoi se “jemi të detyruar të ndërmarrim një ligj special kundër krimit të organizuar dhe terrorizmit”.
“Ky nuk është një proces penal, është administrativ. Dhe ndërkohë KÇK-së i duhet vënë një kufi shumë i qartë, sepse jemi në kushtet kur një anëtar i KÇK shkel; ligjin, askush nuk vepron.
Ndërkohë që duhet sqaruar se KLP dhe KLGJ të marrin masë për pezullim dhe inspektim lidhur me anëtarin përkatës të kësaj organizate kriminale. Deri në funksionimin të Inspektorit të Lartë të Drejtësisë, do bëhet nami në Shqipëri. Në rast se inspektimi vlerëson se nëse gjyqtari apo prokurori që ka shkelur ligjin, është në shkelje, mbi të duhet të fillojë procesi antimafia, që të provojë se nga i buron pasuria”, tha Rama.
Në vijim ai paralajmëroi se do të vendosen sekuestro preventive mbi pronat, që do të thotë se subjektet duhet të provojnë se pasuritë e tyre i kanë të vendosura nga puna.
“Këto subjekte gjithashtu do të përjashtohen çdo nismë apo formë e përfitimit të parave publike”, tha Rama.
Ai u shpreh se ky do të jetë një ligj i përkohshëm, por që do t’i nënshtrohen të gjitha subjektet.
“Anti-mafia italiane sekuestron edhe pasuritë e të vdekurve”, tha Rama.
