Presidenti Ilir Meta vijon të këmbëngulë në qëndrimin e tij për mbrojtjen e Kushtetutës së vendit. Më herët gjatë kësaj të hënë, Meta u bëri thirrje qytetarëve që të dalin në shesh më 8 dhjetor për të nderuar lëvizjen e Dhjetorit. Më vonë gjatë ditës, në një deklaratë për mediat, kreu i shtetit tha se, ka vendosur të zbresë në shesh dhe “s’do zbres nga sheshi derisa sa të detyrojmë parlamentin dhe gjithë të tjerët që të zbatojnë këtë detyrim kushtetues”. Kjo shtoi Meta, në mënyrë që qytetarët të ushtojnë pushtetin, pasi sipas tij, klasa politike ka dështuar.
“Në Kushtetutën që ka miratuar vet populli me referendum ka vendosur referendum në nenin 150 të Kushtetutës të votuar me referendum. Aty thuhet: ‘Populli, nëpërmjet 50 mijë shtetasve me të drejtë vote, ka të drejtën e referendumit për shfuqizimin e një ligji, si dhe t’i kërkojë Presidentit të Republikës zhvillimin e referendumit për çështje të një rëndësie të veçantë. Kuvendi, me propozimin e jo më pak se një së pestës së deputetëve ose me propozimin e Këshillit të Ministrave, mund të vendosë që një çështje ose një projektligj i një rëndësie të veçantë të shtrohet në referendum. Parimet dhe procedurat për zhvillimin e referendumit, si dhe vlefshmëria e tij parashikohen me ligj’. S’kemi asnjë refendum në 21 vite se politika e ka penguar realizimin e një ligji të tillë. Unë si president kam vendosur pas gjithë përpjekjeve të mia në këtë zyrë për të gjetur rrugën e dialogut me qeverinë, kuvendin, institucionet e tjera, opozitën. Dështuan të hapin negociatat. Kam vendosur të zbres në shesh dhe s’do zbres nga sheshi sa të detyrojmë parlamentin dhe gjithë të tjerët të miratojnë që të zbatojnë këtë detyrim kushtetues”, tha Meta.
Kreu i shtetit u bëri dhe një apel qytetarëve:
“Jeni të pashpresë nëse se ushtroni demokracinë drejtpërdrejtë, nëse jo pas disa vitesh këtu s’do mbetet njeri, do ketë vetëm emigrantë”, tha.
Meta deklaroi se në 8 Dhjetor do shpalosë një platformë për këtë çështje. Presidenti tha se ka ardhur koha e referendumeve në vend dhe qytetarët duhet të qeverisin përmes referendumeve.
