Në librin e “Qytetarisë” së klasës së tetë të shkollës 9-vjeçare në Shqipëri, është një hartë e Europës, në të cilën Kosova është pjesë e Serbisë dhe jo një shtet i pavarur. Lidhur me këtë “skandal”, ministrja e Arsimit, Besa Shahini pranoi gabimin por e cilësoi si të paqëllimshëm.
Lidhur me këtë deklaratë të saj ka reaguar dhe ish-deputeti i Partisë Demokratike, Luçiano Boçi, i cili shprehet se Shahini kërkon kështu që budallallikun e vet ta përdorë si varkë shpëtimi për çmendurinë e shefit.
Postimi i plotë:
NAIVJA DHE I ÇMENDURI
Teksa bën deklarata qesharake për mungesën e Kosovës në hartat e teksteve shkollore, Shahini përpiqet të dalë para opinionit si naive seriale.
Si Ministrja e Arsimit me origjinë nga Kosova që nuk mund ta pranojë një gjë të tillë dhe s’mund ta lejojë një gjë të tillë, ndërkohë që harta me ulërimën e saj e bëri punën e vet.
Bën sikur heqja nga harta e Kosovës në tekste, është një rastësi e keqe nga ato që asaj i ndodhin shpesh këto muaj drejtimi në Ministri.
Sikur kjo nuk është asgjë, por thjeshtë lapsus hartuesish, ndërkohë, duket që nuk është aspak rastësi.
Por është një provokim i pranueshmërisë së opinionit për projekte perspektive.
Kërkon kështu që budallallikun e vet ta përdorë si varkë shpëtimi për çmendurinë e shefit.
Po pse e rastit është vëllazëria e Ramës me Vuçiç dhe deklaratat e stisura për të fituar pikë në opinion?!
Apo rastësi quhet propaganda e shfrenuar para një viti, që për pak desh na e bëri Skënderbeun me origjinë serbe?!
Mos vallë rastësi konsiderohet Kosova e munguar në publikimin në faqen zyrtare të Ramës?!
Ndoshta rastësi për Besën e Ramën është dhe minishengeni sllav që na shitet si i bekuar nga perëndimi?!
Sa shumë “rastësi” të çmendura që kanë bërë këta.
Por të jenë të bindur që rastësia nuk ka për t’i shpëtuar nga gjykimi i opinionit publik.
