Maja Koçijançiç, Zëdhënëse për Punët e Jashtme dhe Politikën e Sigurisë e Bashkimit Evropian, me anë të një deklarate për shtyp i ka cilësuar si të “papranueshme” deklaratat e Presidentit Ilir Meta mbi diplomatët në Tiranë.
Duke folur në emër të BE-së, ajo shprehet se përfaqësuesit e saj në Tioranë po punojnë në mënyrë të shkëlqyer për të çuar përpara reformat dhe për të bërë të mundur futjen e Shqipërisë në familjen evropiane.
Deklarata
Deklaratë e Maja Kocijancic, Zëdhënëse për Punët e Jashtme dhe Politikën e Sigurisë / Politikat e Fqinjësisë Evropiane dhe Negociatat e Zgjerimit
Deklaratat e përfaqësuesve të autoriteteve shqiptare dhe partive politike që vënë në dyshim integritetin e bashkësisë diplomatike të Bashkimit Evropian në Tiranë për qendrime të shprehura në cilësinë e tyre institucionale janë krejtësisht të papranueshme. Deklaratat dhe veprimet e përfaqësuesve të Bashkimit Evropian përfaqësojnë qëndrimet dhe pikëpamjet e BE-së.
Ne përsërisim mbështetjen tonë të plotë për punën e shkëlqyer që Ambasadori i BE-së dhe Delegacioni i BE-së po bëjnë për ta sjellë vendin më pranë Bashkimit Evropian.
Bashkimi Evropian, të gjithë përfaqësuesit e tij dhe vendet anëtare po punojnë për t’i mbështetur në mënyrë efektive përpjekjet e Shqipërisë për t’i çuar përpara reformat thelbësore në dobi të qytetarëve shqiptarë.
Ne besojmë se respekti dhe bashkëpunimi është i garantuar nga të gjithë aktorët në vend, me qëllim promovimin e partneritetit tonë me Shqipërinë.
