Zëvendëskryetari i LSI-së, Luan Rama, shprehet se qëndrimet e Departamentit Amerikan të Shtetit për Gjykatën Kushtetuese dhe reformën në drejtësi, janë plotësisht korrekte.
Në një reagim në rrjet, Luan Rama thotë se SHBA nuk kanë asnjë mëdyshje për të mbajtur larg duart e politikës nga reforma në drejtësi.
“Plotësisht dakord me Departamentin Amerikan të Shtetit! Asnjë dilemë, asnjë mëdyshje. Plotësisht dakord me Departamentin Amerikan të Shtetit: “respektimi i ligjit është mbi të gjitha”. Shqipëria nuk ka rrugë tjetër përveç zbatimit të Kushtetutës dhe përshpejtimit të ritmit të reformave të integrimit europian, në partneritet të plotë dhe strategjik me SHBA. Larg duart e politikës nga reforma në drejtësi, larg duart nga Gjykata Kushtetuese!”, shkruan Luan Rama.
Reagimi i zv.Kryetarit të LSI-së erdhi pasi Departamenti Amerikan i Shtetit ka reaguar ndaj deklaratave dhe komenteve të Presidentit Ilir Meta mbi qëndrimin e Ambasadës së SHBA në Tiranë, e cila mbështeti idenë për të dërguar në Komisionin e Venecias çështjen e Kushtetueses, pas ngërçit të krijuar mbi zgjedhjen e anëtarëve të saj.
Departamenti i Shtetit thotë se “është në dijeni” të komenteve të Presidentit Ilir Meta ndaj ambasadës së Shteteve të Bashkuara dhe diplomatëve amerikanë dhe se “është duke e vëzhguar situatën”.
Pas sugjerimit të djeshëm të ambasadës amerikane në Tiranë që Shqipëria t’i drejtohej për opinion Komisionit të Venecias lidhur me përplasjen për çështjen e emërimeve të anëtarëve të Gjykatës Kushtetuese, Presidenti Meta u shpreh me një gjuhë të ashpër duke thënë “Jo më shtet të ambasadave, por shtet të së drejtës”.
Duke iu përgjigjur interesimit të Zërit të Amerikës për komentet e djeshme të Presidentit Meta, zëdhënësi i Departamentit të Shtetit tha se “respektimi i ligjit është mbi të gjitha”.
“Qëndrimi i Shteteve të Bashkura nuk ka ndryshuar”, thotë zëdhënësi, duke shtuar se “vazhdimi i përparimit me reformat është jetik për stabilitetin dhe begatinë e Shqipërisë, si dhe për çuarjen përpara të synimit tonë të përbashkët, atë të anëtarësimit të Shqipërisë në Bashkimin Evropian”. Shtetet e Bashkuara, shton më tej zëdhënësi, “do të vazhdojnë të mbështetin Shqipërinë si një vend mik, partner dhe aleat, teksa vendi kryen reforma jetike”.
