“Po, zëdhënësi im, z.Tedi Blushi është shantazhuar në emër të një Ambasade të huaj në Tiranë, që të tërheqë një postim të bërë sot paradite për shkak të detyrës brenda 30 minutash”. Deklarata është bërë nga Presidenti Ilir Meta.
“Kam kërkuar hetim të menjëhershëm. Shpresoj të jetë lojë e Rilindjes por mjerë ata diplomatë që mund të kenë kërcënuar Zëdhënësin e Presidentit të Republikës”, shton më tej kreu i shtetit në një postim në FB.
I vetmi reagim i Blushit këtë të premte ndaj një selie diplomatike, ishte ai që bëri pasi ambasada amerikane sugjeroi që për ngërçin në Kushtetuese të merret opinioni i Komisionit të Venecias.
Në përgjigje, ëdhënësi i Metës, Tedi Blushi deklaroi se “tymi i Venecias” është turpi më i fundit i një grupi të strukturuar diplomatik në Tiranë. Në një postim në rrjetet sociale, ai u shpreh: ”Mjaft më ‘Rule of Embassy’. Është koha për “Rule of Law” si çdo vend demokratik”. “Rruga e Elbasanit të çon në Elbasan, shtoi, dhe Rama e përdor dhe për në Xibrakë”, lokalitet ku disa vite më parë u zbulua një laborator kokaine.
“Garantët e veprimeve të paligjshme dhe mafioze të Dvoranit e kanë marrë mbrëmë përgjigjen zyrtare në një bisedë zyrtare tepër të përgjegjshme të Kryetarit të Shtetit. Tymi i Venecias që hodhi me porosi të Ramës, Ambasadori në ikje i Agaçit pak ditë më parë, është turpi më i fundit i grupit të strukturuar diplomatik në Tiranë, bashkëfajtor për dhunimin sistematik të Reformës në Drejtesi dhe me qëllim kapjen e saj të plotë nga Regjimi monist i Edi Ramës. Mjaft më ‘Rule of Embassy’. Është koha për “Rule of Laë” si çdo vend demokratik. Rruga e Elbasanit të çon në Elbasan dhe Rama e përdor dhe për në Xibrakë! Rruga e Kavajës të çon në Kavajë! Vetëm rruga e Kushtetutës na çon në Europën e Bashkuar!”, u shpreh Blushi në reagimin e tij.
Deklaratat e Blushit u mbështetën edhe nga Presidenti Meta në një prononcim për gazetarët.
“No more ‘Rule of Embassy’. Është koha për ‘Rule of Law’”, tha Meta. “Larg duart nga Gjykata Kushtetuese. Hipokritët që duan të çojnë gjoja këto akte në Venecia, ata janë hipokritë sepse duhet të çonin zgjedhjen e Arta Markut. Tani duan ta bëjnë për të shpëtuar Dvoranin sepse Dvorani nuk është fajtori i vetëm. Dvorani ka patur dhe disa garanci të disa palaçove ndërkombëtarë për të përpunuar gjithë procesin me KED, siç ka ndodhur. Shikoni dhe Avokatin e Popullit dhe raportin e saj, kështu që zgjidhja është referendumi”, shtoi ai.
