Jemi në një situatë anormale, të pandodhur më parë, por zgjedhjet e parakohshme nuk janë rruga e duhur.
Kështu shprehet deputetja socialiste Elona Gjebrea, ndërsa akuzon opozitën për situatën politike në vend.
E ftuar në Oraneës, Gjebrea shprehet se qeveria dhe Parlamenti janë në funksionim, ndaj dhe zgjedhje të parakohshme s’mund të ketë.
“Ne nuk mendojmë që Shqipëria duhet të ketë zgjedhje të parakohshme. Ne jemi duke vazhduar punën. Sigurisht është një situatë anormale edhe një situatë e pa ndodhur më parë.
Për fatin tonë të keq e ndodhur jo nga ana e mazhorancës por nga ana e opozitës. Fakti që ne kemi tashmë opozitë brenda parlamentit na mundëson që të kemi një parlament që po përpiqet të bëjë të gjitha detyrat ashtu siç duhet”, u shpreh Gjebrea.
Ndërkohë që reformën zgjedhore e sheh si një mundësi për bashkëpunim me opozitën, Gjebrea thekson se “kemi dëgjuar që ata kanë një draft që duan ta paraqesin dhe shpresojmë që të kemi vërtet një klimë dialogu dhe bashkëpunimi, aq më tepër në situatën ku ndodhet vendi”.
