Për ish-deputetin e Partisë Demokratike, presidenti Ilir Meta duhet ta kishte shpërndarë parlamentin para shumë kohësh. Përballë gazetarit Ilir Babaramo, Salianji tha se ky parlament nuk përfaqëson më popullin.
“Nuk përfaqëson interesat e qytetarëve. Është i vonuar për ta kryer si akt. Meta duhet ta kishte shpërndarë me kohë parlamentin”.
“Nesër Meta duhet të vijë me propozime konkrete”
Salianji u shpreh se nga takimi i nesërm me presidentin, Meta duhet të ketë propozime nga ana e këtij të fundit se si mund të arrihet në zgjidhjen e ngërçit për Gjykatën Kushtetuese.
“Duhet të ketë propozime konkrete nga ana e presidentit që ka thirrur tryezën. Nuk na takon ne të flasim. Ne do japim zgjidhje për krizën politike që ka përfshirë vendin“, tha Salianji.
“Duhet të largojmë qeverinë me çdo mjet”
Ish-deputeti i PD-së deklaroi se vendi është në kushtet që kjo qeveri duhet të largohet me çdo mjet.
“Pa diskutim pushteti nuk merret me forcë, por po e padiskutueshme është që qeveritë rrëzohen më forcë, me forcën e popullit të bashkuar. Populli që të ka emëruar, kur nuk përfaqëson interesat e tij, të largon. Jo një herë katër vjet, por mandatet e keni parë që ndërpriten edhe me forcë. Por largimi i qeverisë nga populli bëhet edhe nëpërmjet forcës dhe unë mendoj që jemi padyshim në këto kushte. Që qeveria duhet të largohet me çdo mjet, me forcën e popullit të bashkuar”, tha Salianji.
