Socialistët e Durrësit kanë zgjedhur dje 34 delegatët për Kongresin e PS-së, nga 10 rajonet.
Ajo që bie në sy në listën fitues është fakti se pjesa më e madhe e delegatëve janë emra të njohur të PS-së, që njihen si mbështetës të ish-kryebashkiakut Vangjush Dako.
Por jo vetëm, një pjesë e konsiderueshme e tyre mbajnë pozicione kyçe në PS, Këshillin Bashkiak dhe institucionet në qytetin bregdetar.
Mes fituesve janë Adrian Çela, Ani Dyrmishi, Afrim Bakaj, Arben Isaku, Spartak Kovaçi, Eljo Jani, Aljon Hysko, Roni Shqiopa, Ana Dhamo, Klementina Meci, Mirela Gumeni, Alneida Rroshi.
Pas votimeve të 30 qershorit, ku Valbona Sako mori mandatin e kryebashkiakes së Durrësit, u raportuan disa përplasje mes saj dhe linjës së ish-Kryebashkiakut Dako. Në këtë kuadër, disa nga emrat që kishin punuar për vite me rradhë në krah të tij u detyruan të dorëhiqen ose të largohen nga pozicionet e tyre nga Sako.
Gjithsesi votimet e djeshme në Durrës në rradhët e socialistëve, tregojnë se Dako ka ende influencë në strukturat e PS-së, edhe pse drejtimin e bashkisë dhe institucioneve në varësi të saj, duket se e kontrollon Sako.
Delegatët e përzgjedhur nga anëtarësia socialiste për në kongresin e PS-së, do të kenë mundësi që të zgjedhin kryetarin e PSSH-së, por Edi Rama nuk i ka hapur zgjedhjet brenda partisë.
Zgjedhjet brenda partisë janë hapur verëm për krerët e degëve lokale që pritet të mbyllen deri në mes të muajit dhjetor.
