Në konferencën për shtyp që mbajti në prag të ndeshjes së Shqipërisë me Francën, trajneri Deschamps preku disa nga temat në lidhje me këtë ndeshje.
Duke folur për Shqipërinë ai deklaroi:
“Unë pres që ekipi im të marrë një rezultat pozitiv. Ndeshjen e Shqipërisë me Andorrën e kam parë, pasi duhet të përshtatej skema për sfidën e ardhshme”.
“Do të thosha që do të jetë një ndeshje e fortë, pasi do të luajnë në fushën e tyre në inaugurimin e stadiumit. Shqiptarët do të manifestojnë dashurinë e tyre për futbollin”.
“Do të thosha që Shqipëria ka lojtarë të një cilësie të mirë, duhet ta pohoj këtë. Duhet t’i referohem dhe humbjes që pësuam në Elbasan, 1-0. Keni lojtarë të nivelit ndërkombëtar”.
Ndërsa i pyetur për yllin e skuadrës franceze, Kylian Mbappe, ai deklaron:
“Është një lojtar klasi, që bën diferencën, por duhet thënë se Kyliani është pjesë e një grupi. Unë kam diskutuar me të edhe kur ai merr nismat individuale, por varet dhe nga lojtarët që ai ka në krah në ato momente. Duhet thënë se është një lojtar që bën diferencën”.
