Shqipëria luan mbrëmjen e sotme në “Elbasan Arena” kundër Andorrës, të parën nga dy ndeshjet e fundit eleminatore të Euro 2020. Edy Reja duhet të administrojë një grup me mungesa me peshë, me situata pakënaqësie të reflektuara në daljet e fundit të Kombëtares, por edhe të ruajë ecurinë pozitive dhe performancat e mira të treguara në tetor.
Për sa i përket formacionit, Edi Reja pritet t’i qëndrojë besnik skemës 3-5-2.
Nga lodhja muskulare që shfaqi Strakosha, pas ndeshjes së fundit të Serie A me Lecce ku priti edhe penalltinë, kuadrati i portës mund ti besohet Berishës, për të mos rrezikuar.
Prapavija do të ketë ndoshta një ndryshim dhe kjo lidhet me formën e shkëlqyer që tregoi Veseli në dy ndeshjet e tetorit kur zëvendësoi Hysajn e dëmtuar. Shkodrani rikthehet, luajti 84 minuta edhe me Napolin, duke marrë krahun e tij të kompetencës, por Veseli mund të ulë në stol Ismajlin, duke formuar repart me Dermakun e Gjimshitin.
Mesfusha ka të paprekshmin Bare e Gjasula, ndërsa Memushaj, që është stërvitur i diferencuar për shkak të gjendjes gripale mund të presë ndeshjen e 17 nëntorit kundër Francës.
Në krahët e mesfushës me pesë mund të preferohet Roshi nga minuta e parë e ndoshta është radha edhe e Selahit, pavarësisht se spikat edhe Ndoji për një fanellë titullari.
