Parlamenti do të mblidhet nesër në një seancë të jashtëzakonshme për të shqyrtuar dekretin e Presidentit Ilir Meta, lidhur me marsida Xhaferllarin, e dekretuar si anëtare e Gjykatës Kushtetuese.
Vendimi për mbledhjen e Kuvendit pritet të zyrtarizohet në Konferencën e Kryetarëve, e cila do të caktojë edhe orën se kur do të mblidhet senaca.
Një ditë më parë Kreu i Shtetit nxori dekretin për emërimin e Xhaferllarit si anëtare të Kushtetueses. Meta vlerësoi profilin e kandidates, e cila në listat e KED renditej e 4-ta.
Përplasja mes Institucionit të Presidentit dhe Kuvendit ka të bëjë me rradhën e përzgjedhjes së anëtarëve. Kushtetuta parashikon që anëtarët zgjidhen 1 nga Presidenti, që në rastin konkret ishte Besnik Muçi, kandidati i dytë duhej të zgjidhej nga Parlamenti, i cili njëherazi plotësoi dy vakanca, dhe kandidati i 3-të do të zgjidhej nga Gjykata e Lartë, që nuk është në funksion.
Por Kuvendi, shpalli Arta Vorpsin si kandidaten fituese, me argumentin që Presidentit i kishte mbaruar afati 30 ditor, në një kohë kur Kuvendi nuk kishte zgjedhur ende kandidaturën e tij.
Dekreti i Presidentit për Xhaferllarin është konsideruar si anti-Kushtetues dhe i papranueshëm, çka pritet të rrëzohet në seancën e së premtes.
