Vendimi i Kuvendit të Shqipërisë për zgjedhjen e dy anëtareve të reja të Gjykatës Kushtetuese, Elsa Toska dhe Fjona Papajorgji, është botuar në Fletoren Zyrtare.
Kjo do të thotë se ata tashmë janë zyrtarisht anëtare të Kushtetueses, pasi të betohen te Presidenti i Republikës.
Toska dhe Papajorgji u zgjodhën nga Kuvendi me 105 vota pro secila, ku përveç deputetëve të PS-së, votuan pro edhe deputetë të asaj që quhet “opozita e re”.
Por ajo që bie në sy, është fakti se në Fletoren Zyrtare nuk është botuar emërimi i Arta Vorpsit si anëtare e Gjykatës Kushtetuese. Kjo konsiderohet e tillë nga KED dhe mazhoranca socialiste me argumentin se Presidentit i përfunduan afatet dhe ajo renditej e para në listën e KED.
Ditën e sotme Vorpsi ka kryer betimin para noterit, ndërkohë që Presidenti Meta ka dekretuar kandidaturën e Marsida Xhaferrllarit për këtë post.
