Avokati Ledoi Braho tha se Presidenti Ilir Meta veproi në përputhje me Kushtetutën me dekretimin e Marsida Xhaferrllarit si anëtaren e gjashtë të Gjykatës Kushtetuese.
“Presidenti nxori një dekret duke emëruar Xhaferrllarin, një zgjedhje kushtetuese, zgjedhja e KED për Arta Vorpsin është e pavlefshme. Deri kur se thërret Meta Vorprin, ajo se merr detyrën. Mund te luhet me dekretin e Xhaferrllarit që nuk është botuar në Fletoren Zyrtare, por detyrën ja jep dekreti i presidentit”, tha Braho, në studion e “Abc News”.
Avokati u shpreh se partnerët ndërkombëtarë u nxituan kur përgëzuan Kuvendin për zgjedhjen e dy emrave për anëtarë në Kushtetuese, një ditë para kritikave të Presidentit i cili foli për shkeljet kushtetuese të Kuvendit dhe KED në këtë proces.
Sakaq, Shefqet Muçi, ish-gjyqtar, deklaroi se zgjedhja e dytë e Kuvendit për vakancën në Gjykatën Kushtetuese ishte antiligjore.
Edhe avokati Jordan Daci u shpreh se Meta nuk e ka shkelur Kushtetutën. Sipas Dacit, KED duhet të bënte dy palë lista një për vakancat e Presidentit dhe një për Kuvendin. Daci shtoi se sipas informacioneve të tij, dekreti i presidentit për Marsida Xhaferllarin nuk do botohet në fletoren zyrtare.
“KED duhet të bënte dy palë lista një për vakancat e Presidentit dhe një për Kuvendit. Kjo është një situatë e cila, ishalla nuk e çojnë te KQZ. Me sa mora vesh unë nuk do e botojnë dekretin e Presidentit. Mua më vjen keq për një gjë se Arta Vorpsi është një ndër kandidaturat më të përgatitura dhe është fat i keq që ky vend godet më të mirët gjithmonë”, tha ai.
Lexo edhe/ Ledio Braho: Ja pse Presidenti veproi drejt me kandidaturën e Xhaferrllarit për GJK
