Fatjona Memçaj, një prej 3 kandidatëve për Prokuror të Përgjithshëm, ishte sot në një seancë dëgjimore para Këshillit të Lartë të Prokurorisë, ku iu përgjigj edhe pyetjeve të anëtarëve të këtij institucioni.
Një prej pyetjeve që iu drejtua prokurores Memçaj ishte ajo nëse do të vinte nën përgjim zyrtarë të lartë të shtetit, nëse konstatohet se kanë thyer ligjin.
“Ju po më pyesni a do guxoj ta thyej ligjin. Unë nuk e thyej ligjin. Nuk jam nga ata njerëz që frikësohem, por do të thotë se ligjin e quaj të shenjtë dhe nuk ia lejoj vetes t’a bëjë.
Prokurori i Përgjithshëm është akuzuar se nuk repsekton të drejtat njerëzore, të gjithë të barabartë para ligjit. Do pranoja çdo penalitet nëse nuk do e bëja”, tha Memçaj.
Kandidatja për Kryeprokurore deklaroi se ka kontribuar në hartimim e rregullores së brendshme të Presidentit të Republikës.
Ajo tha se Prokurori i Përgjithshme duhet të tregojë integritet dhe të paraqitet si menaxher i burimeve njerëzore.
“Aktualisht ushtroj funksionin në këtë prokurori. Kam mbaruar studimet për doktoraturë dhe më është dhënë konfirmimi i gradës.
Kam 18 vite eksperiencë, veprimtari si mësimdhënëse. Prej disa vitesh jam anëtare e KED. Platforma ime për Prokuror të Përgjithshëm, kam paraqitur në mënyrë të detajuar që PP dhe drejtuesi i tij janë aty për të respektuar ligjin. Integritet të demonstrojë.
Prokurori i Përgjithshëm ka kompetenca shumë të ngushta, paraqitet si menaxher për burimet njerëzore e financiare.
Prokurori ka raportimin mbi gjithë veprimtarinë dhe aktivitetin e organit të akuzës. Marrëdhënia me këshillin nuk është formale, e shoh marrëdhënie bashkëpunimi. Të trajtoj shqetësimin e prokurorëve, këtë pjesë e ndanë me KLP.
Prokuroria është në periudhë zhvillimi, me mungesë prokurorësh, me volum shumë të madh pune, edhe prokuroria ku punoj unë gjithashtu. Marrëdhënia me të gjithë institucionet duhet të jetë përtej marrëdhënies formale, sidomos me Këshillin e Ministrave”, tha ajo.
