BBC ka publikuar një reportazh të gjatë për muxhahedinët iranianë, të vendosur në Tiranë prej kohësh.
Qëllimi i shkrimit është për të zbuluar nëse muxhahedinët e MEK janë një kult, që kufizon anëtarët edhe nga fantazitë seksuale.
Pasi interviston disa disidentë të këtij grupimi, që vazhdojnë të jetojnë në Tiranë në pamundësi për të lënë vendin, BBC pyet një burim diplomatik, që thotë se MEK është një grup unik kulturor- por jo një kult.
Në mbështetje të grupit janë investuar amerikanët, që jo vetëm vendosën t’i sjellin në Shqipëri, por edhe kanë dërguar zyrtarë të nivelit të lartë në Tiranë për të shprehur mbështetjen e tyre për lëvizjen opozitare iraniane. Mes tyre është edhe avokati personal i presidentit amerikan, Rudy Giuliani.
Lideri i opozitës, Lulzim Basha, që ishte në qeveri kur u mor vendimi për pranimin e iranianëve, thotë se “ne u ofruam strehë prej sulmeve dhe abuzimeve dhe mundësinë për të nisur një jetë normale në një vend ku nuk ngacmohen, sulmohen apo brutalizohen”.
Edhe pse, disa shqiptarë shqetësohen se prania e MEK kërcënon sigurinë kombëtare.
Dy diplomatë iranianë u dëbuan pas akuzave për komplote të dhunshme kundër Muxhahedinëve, dhe Bashkimi Evropian ka akuzuar Teheranin se ishte pas komploteve për të vrarë kundërshtarët e regjimit, përfshirë anëtarët e MEK, në tokën Hollandeze, Daneze dhe Franceze. Ambasada iraniane në Tiranë hodhi poshtë kërkesën e BBC për një intervistë.
Një burim i nivelit të lartë në Partinë Socialiste është gjithashtu i shqetësuar se shërbimet e inteligjencës kanë mungesë të aftësisë për të monitoruar më shumë se 2.500 anëtarë të MEK, që janë të trajnuar ushtarakisht.
“Asnjë njeri me tru nuk do i pranonte këtu,” tha burimi.
Një diplomat thotë se disa prej muxhahedinëve me siguri po punojnë për Iranin. Gholam Mirzai dhe Hassan Heyrany janë akuzuar nga vetë MEK se janë agjentë për Teheranin. Por kjo është një akuzë që ata e mohojnë.
