Isa Mustafa, kryetar i LDK-së, parti e cila bashkë me Vetëvendosjen do të formojnë qeverinë e re të Kosovës, ka dalë kundër idesë së “Shengenit Ballkanik”.
Mustafa mendon se një nismë e tillë është krijimi i “Jugosllavisë së re”.
Reagimi i Mustafës vjen në një kohë, kur në Ohër të Maqedonisë së Veriut, janë mbledhur për takimin e dyte brenda pak javësh, Presidenti serb Aleksandar Vuçiç, Kryeministri i Shqipërisë, Edi Rama dhe ai maqedonas, Zoran Zaev.
“Në shikim të parë duken projekte atraktive, por në esencë çojnë në një Jugosllavi të re, me Shqipërinë e pa Kroacinë dhe Slloveninë. Janë ide që nuk i kemi përkrahur sa e kemi drejtuar qeverinë dhe nuk do t’i përkrahim si Lidhje Demokratike e Kosovës, as në pozitë dhe as në opozitë. Ashtu siç nuk përkrahim ndryshimin e kufijve shtetëror të Kosovës.
Kosova duhet të aspirojë tregun unik evropian, fillimisht mbi bazën e MSA-së që rregullon edhe doganat dhe të bëhemi pjesë e Marrëveshjes Shengen, ku janë shtetet e BE-së.
Marrëveshjet e mini-Shengenit lindi kur nuk u realizua projekti i ideuar në Serbi për Unionin Doganor dhe ideja për Unionin Ekonomik të Vendeve të Ballkanit Perëndimor, për shkak të kundërshtimit të Kosovës dhe të Malit të Zi”, shkruan Mustafa në një postim në rrjet.
Madje kreu i LDK-së në reagimin e tij thumbon edhe Kryeministrin Edi Rama, ndërsa i cilëson si manovrime të Serbisë për të bishtëruar detyrimet ndaj Bashkimit Evropian për normalizim të marrëdhënieve me Kosovën dhe për njohje të pavarësisë së Kosovës, nisma të tilla.
“Ndoshta kryeministri i Shqipërisë dhe ai i Maqedonisë Veriore e kanë të qartë se ku janë interesat e vendeve të tyre por Kosova asesi”, shkruan Mustafa.
