“Nuk kam lidhje me ngjarjen ku ka mbetur i plagosur prokurori dhe dy persona të tjerë. Nuk i njoh personat e përfshirë, ngjarjen e mësova nga mediat”.
Kështu mësohet të jetë shprehur në Gjykatën e Krimeve të Rënda, Redjan Rraja, ku po zhvillohet seanca për vendosjen e masës së sigurisë.
Raportohet se Rraja ka dhënë shpjegime për lëvizjet që ka bërë ditën kur prokurorit Arjan Ndoja i kanë bërë atentat.
“Ditën kur ka ndodhur ngjarja kam qenë duke përshkruar itinerarin që bëj gjithmonë në Tiranë-Durrës-Fushë Krujë”, mësohet të jetë shprehur Rraja.
Rraja ka dalë sot në orën 14:00 para Gjykatës së Krimeve të Rënda ku do të njihet me masën e sigurisë. Ai mbrohet nga dy avokatë Besnik Çerekja dhe Ilir Murati, të cilët kërkojnë lirimin.
Ndërsa Prokuroria ka kërkuar masën “arrest me burg” për 34-vjeçarin. Rraja akuzohet për ‘vrasje e funksionarëve publik’, ‘ armëmbajtje pa leje’ si dhe ‘vrasje e mbetur në tentativë’.
Rraja u ndalua pasditen e të hënës ndërsa udhëtonte me automjetin e tij drejt Hanit të Hotit.
