Kadastrat do t’i çlirojmë nga rrethimi kriminal. Deklarata është bërë nga Kryeministri Edi Rama, i cili pas 6 vitesh në krye të qeverisjes së vendit, duket se ka gjetur fajtorët e rradhës, për atë që po ndodh me institucionet.
Nëse në mandatin e parë qeverisës, kishte zgjedhur që përgjegjësinë për çka ndodhte t’ia faturonte qeverisë së PD-së, sot në mandatin e dytë duket se Rama ka gjetur gjyqtarë e prokurorë, që sipas tij janë pjesë e KÇK-së.
Reagimi i Ramës erdhi pasi një qytetar i shprehu shqetësimin lidhur me kadastrën e Durrësit, aty ku kreu i saj, Liridon Pula u arrestua me urdhër të prokurorisë, por që u mor në mbrojtje nga Kryeministri dhe zyrtarë të tjerë të qeverisë.
Deklarata
Qytetari: Dërguam shkresën Kadastrës së Durrësit por përgjigja nuk erdhi. i shkruajta platformës edhe për 10 ditë u zgjidh problemi, sekuestri u hoq, prona është prapë e imja.
Rama: Faleminderit për praninë edhe pse na preke në një plagë të hapur që është Kadastra e Durrësit, por jam i bindur që ligji special kundër krimit të organizuar dhe masa speciale kundër KCK do e clirojnë përfundimisht edhe Kadastrën e Durrësit dhe gjithë kadastrat nga rrethimi kriminal që ka nisur prej shumë e shumë vitesh dhe që ne kemi arritur ta cajmë vetëm pjesërisht sidomos në zonat që kanë një interes zhvillimi turistik aty ku krimi i organizuar përpiqet të shpëlajë paratë e pista por nuk do i gëzojnë, nuk do i gëzojnë”.
