Kryeministri Edi Rama, njëherazi Kryetar i PS-së, do të mbledhë të martën deputetët, koordinatorët dhe të deleguarit e degës së kësaj partie në Shkodër , në një tentativë për të zgjidhur krizën e krijuar në kryeqendrën e veriut pas dështimit me Valdrin Pjetrin dhe përplasjeve mes deputetëve.
Sikundër është raportuar kreu i PS-së ka vendosur të marrë në dorë vetë situatën lidhur me emërimet e drejtorëve rajonalë, pas përplasjeve të deputetëve të qarkut të Shkodrës.
Po kështu raportohet se organizimi i strukturave socialiste do të bëhet po nga Rama, pasi grupet e punës nuk kanë mundur të dalin me konkluzione të qarta.
Burime nga dega e PS-së në qytetin më të madh verior të vendit shprehen se çdo propozim i bërë nga strukturat është rrëzuar në qendër, ndërsa duket ligjvënësit kanë hyrë në një garë se kush do të kontrollojë më shumë institucionet përmes emërimeve.
Sipas burimeve, pritet që të ketë një analizë mbi emrat që janë emëruar, më pas janë detyruar të dorëhiqen dhe nuk përjashtohet mundësia që si në rastin e Ditmir Bushatit, që u largua si drejtues politik i qarkut, të ketë të tjera “prerje kokash”.
Në mbledhjen e fundit, Paulin Sterkaj duke iu drejtuar Edi Ramës tha se çështja e emërimeve të drejtorëve është bërë si tenderat.
Kjo kritikë e Sterkajt ka sjellë reagimin e Ramës, i cili është shprehur se kishte menduar që situata të zgjidhej nga deputetët dhe koordinatorët, ndërsa paralajmëroi marrjen në dorë të zgjidhjes së situatës.
Raportohet se deputeti më me ndikim është Tom Doshi, i cili ndonëse zyrtarisht i përket PSD-së, duket se vijon të mbetet krahu i djathtë i Edi Ramës në Shkodër. Mësohet se Doshi ka kërkuar që një prej nënkryetarëve në Bashkinë e Vaut të Dejës, të emërohet prej tij, dhe me shumë gjasa kjo kërkesë do t’i plotësohet nga Rama.
Në kushtet kur kreu i Bashkisë së Vaut të Dejës, Mark Babani, mund të humbasë mandatin për shkak të ligjit të dekriminalizimit, kompetencat e kryetarit i kalojnë nënkryetarit.
Por jo vetëm kaq, sikundër raportohet gjithashtu pritet që disa prej drejtorëve rajonalë të propozohen po nga Tom Doshi.
Në anën tjetër, Rama duhet të mendojë për riorganizimin e degës së PS-së në Shkodër, e cila me një vendim kryesie është shkrirë totalisht. Ish-drejtues të PS-së janë deklaruar të pakënaqur lidhur me vendimin, duke u shprehur se strukturat nuk janë si domatet.
Në anën tjetër, Arben Pëllumbi, i deleguar nga Rama në Shkodër, ka deklaruar se kritikat janë qejfmbetje dhe asgjë më shumë.
