Interpol Tirana, në bashkëpunim të ngushtë me shërbimet partnere ka ekstraduar nga Greqia 55-vjeçarin Kudret Shametaj, i kërkuar për vrasje nga autoritet shqiptare.
Ky i fundit akuzohet se në vitin 1997 në Manastir të Sarandës, ka vrarë të riun Andon Merkuri, vëllai i ish-Kryetarit të PS Sarandë, Gjergj Merkuri.
Shametaj është dënuar me 18 vjet burg për veprën penale vrasje. Sipas hetimeve, Shametaj dhe Merkuri u konfliktuan për një gomë automjeti dhe Shametaj qëlloi me breshëri kallashnikovi ndaj të riut.
Ai ka lindur në Kuç të Vlorës, ndërsa rezultonte si një nga personat me të kërkuar nga policia e Sarandës.
“Ekstradohet nga Greqia një shtetas shqiptar i dënuar me 18 vjet burg për vrasje dhe armëmbajtje pa leje. Nga specialistët e Interpol Tiarana u krye ekstradimi nga Greqia drejt vendit tonë i shtetasit shqiptar Kudret Shametaj, 55 vjeç. Ky shtetas ishte i shpallur në kërkim ndërkombëtar nga Interpol Tirana, pasi Gjykata e Rrethit Gjyqësor Tiranë e ka denuar me 18 vjet burg për veprat penale ‘Vrasja’ dhe ‘Armëmbajtja pa leje’. Ky shtetas ka vrarë me armë zjarri shtetasin A. M. Si rezultat i bashkëpunimit të Interpol Tirana me Interpol Athina, u bë i mundur arrestimi dhe ekstradimi i tij nga Greqia drejt vendit tonë”, njoftoi policia lidhur me ekstradimin e 55-vjeçarit.
