Atentati mafioz ndaj prokurorit, Arjan Ndoji, ku veç tij mbetën të plagosur edhe Andi Maloku dhe Aleksandër Laho, tregoi edhe njëherë se krimi nuk ka frikë nga shteti.
Një atentat i cili ngre dyshime të mëdha, pasi vetëm pak javë më parë kryeministri Edi Rama nga foltorja e Kuvendit, e më pas edhe zv.kryeminstri Erjon Braçe, drejtuan gishtin nga prokurori Arjan Ndoji duke e kërcënuar se do të ndëshkohet.
A ishte krim i porositur nga pushteti, apo prokurori kishte miqësi me krimin? Këtë ende nuk mund ta thotë askush, pasi pistat e hetimit janë të shumta dhe ende nuk ka asnjë reagim nga institucionet…
Por ajo që e bën më të frikshme këtë situate është heshtja ‘vdekjeprurëse’ e pushtetit, ku deri më tani përveç një informacioni paraprak nga policia, nuk ka asnjë reagim nga mazhoranca.
Në të njëjtën linjë me Rilindjen qëndron dhe Prokurorja e Përgjithshme e Përkohshme, Arta Marku, e cila mesa duket nuk ka nxjerrë as edhe një fjalë për atentatin që ju bë vartësit të saj.
Po në të njëjtën linjë rilindase ‘hesht dhe mos reago’, qëndrojnë edhe institucionet e tjera KPL, Unioni i Prokurorëve, e të gjitha institucionet vartëse, të cilat mesa duket e cilësojnë një ngjarje normale, pasi vetë krimi prej shumë kohësh është kthyer në normalitet në vendin tonë.
Ngjarje të renda kriminale të këtyre përmasave ku krimi guxon dhe prek vetë shtetin janë ngjarje të pakonceptueshme për vendet demokratike.
Në çdo shtet tjetër normal, autorët jo vetëm që do të ishin kapur, por për ngjarjen do të ishin angazhuar dhe reaguar të gjitha institucionet shtetërore për zbardhjen e plotë të saj, por dhe për t’i vënë pikat mbi ‘i’ dhe për t’i treguar kujtdo se: Shteti nuk preket.
Por mesa duket vetë institucionet shtetërore kohët e fundit zbatojnë vetëm dy urdhra të cilat janë:
1.Bandat le të hanë kokën me njëra-tjetrën
2.Kap çfarë të kapësh
Të dy urdhrat janë dhënë direkt dhe publikisht nga vetë kryeministri Edi Rama, ndërsa Prokurorja e Përgjithshme e Përkohshme, Arta Marku kujdeset që ato të zbatohen rigorozisht, madje edhe duke heshtur e vetësakrifikuar si në rastin e Prokurorit Ndoji, ku asnjë institucion nuk reagon më.
Mesa duket ‘heshtja është flori’ do të jetë motoja për vitin e ardhshme të Rilindjes dhe rilindësve. /Boldnews.al
