Vetoja e Emmanuel Macron për të mos hapur negociatat me Shqipërinë dhe Maqedoninë e Veriut, ka ngjallur polemika të shumta në politikën Rajonale por edhe europiane, ndërsa së fundmi ka reaguar edhe ambasadori i Francës në serbi.
Jean Louis Falconi ka deklaruar në intervistën e dhënë për agjencinë ‘Fonet’ se dy vendeve të Ballkanit Perëndimor nuk u është thënë “Jo”, por sipas tij u është thënë “Po, por” dhe “Po, nëse”, çfarë lë të kuptohet se Franca është e hapur ndaj dy shteteve në fjalë nëse përmbushin kriteret e kërkuara.
Sipas tij, nuk ka një vendim të marrë më 18 tetor, sepse përkundër përpjekjeve të konsiderueshme të bëra nga këto vende, përfshirë përfundimin e Marrëveshjes së Prespës, ato duhet të zbatojnë disa reforma.
“Maqedonisë së Veriut dhe Shqipërisë nuk i është thënë “jo” në Bruksel dhe nuk kanë marrë një përgjigje negative për fillimin e negociatave. Në Bruksel, Shkupit dhe Tiranës iu tha “po, por” dhe “po nëse”, ka deklaruar Falconi, duke shtuar se fillimi i negociatave do të pasojë menjëherë pasi këto vende të kenë përfunduar reformat e nevojshme.
Ai shpjegoi se procesi aktual i pranimit të ngadaltë duhet të bëhet “më i shpejtë, më përparimtar, por edhe i kthyeshëm”.
Sipas tij, rezultatet e procesit aktual të pranimit nuk janë të mjaftueshme, qytetarët nuk shohin asgjë konkrete, dhe procesi shpesh është i burokratizuar.
Ideja është që, kur një vend të përfundojë me negociatat në një zonë të caktuar, do të jetë në gjendje të ulet në të njëjtën tryezë me vendet anëtare dhe të marrë pjesë në hartimin e politikave, por pa një të drejtë votimi, shpjegoi Falconi në intervistë.
Ideja është që, kur një vend të përfundojë me negociatat në një zonë të caktuar, do të jetë në gjendje të ulet në të njëjtën tryezë me vendet anëtare dhe të marrë pjesë në hartimin e politikave, por pa një të drejtë votimi, shpjegoi Falconi në intervistë. Kur bëhet fjalë për interpretime të ndryshme të pozicionit të Presidentit Francez, Falconi kujtoi se Macron ishte shumë i qartë gjatë vizitës së tij në Serbi në korrik, kur ai konfirmoi se premtimi i BE për pranimin e Ballkanit Perëndimor në BE do të përmbushet.
Sidoqoftë, ai gjithashtu theksoi se nuk është e vështirë të shihet se BE nuk po funksionon mirë, deklaroi Ambasadori. Ai shpjegoi se kjo është arsyeja pse Macron u angazhua në procesin e përmirësimit të funksionimit të BE-së, që përfshin reformimin e politikës së mbrojtjes dhe sociale, mënyrën e negociimit të marrëveshjeve tregtare, si dhe bërjen e saj më tërheqëse për qytetarët.
