Studentët dhe pedagogët e Fakultetit të Shkencave të Natyrës po protestojnë për Kopshtin Botanik. Me pankarta në duar ata kundërshtojnë kalimin në pronësi të Bashkisë së Tiranës të ambienteve të Kopshtit Botanik.
Bëhet fjalë për një protestë marshim që ka nisur nga FSHN drejt Gjykatës Administrative të Apelit, ku do shqyrtohet paraditen e sotme në orën 12:00 padia e rektoratit të UT kundër vendimit të korrikut të qeverisë për ndryshimin e administrimit të Kopshtit Botanik. Pronësia ka kaluar nga UT tek Bashkia e Tiranës.
Ata kërkojnë që Kopshti Botanik të qëndrojë në pronësi të Universitetit të Tiranës pasi u shërben studentëve dhe pedagogëve, pasi aty është një laborator prej vitesh i përdorur në kuadër të procesit mësimor dhe kërkimeve shkencore.
Ditën e djeshme ka pasur bojkot prej afro 1 orë të procesit mësimor. Kjo është protesta e dytë.
Ndërsa pedagogët e studentët paralajmërojnë protesta nëse vendimi i gjykatës do të jetë kundër tyre.
