Avokati i njohur Ledio Braho i cilësoi si nisma anti-kushtetuese dhe anti-ligjore nismat e qeverisë për krijimin e Korporatës së Investimeve dhe policisë private, të krijuar si shoqëri tregtare, me aksioner të vetëm Ministrinë e Brendshme.
Braho tha se në një vend ku Gjykata Kushtetuese nuk është funksionale, nuk mund të ketë ligjshmëri. Braho tha se vendimet e qeverisë mund të goditen në Gjykatat e Apelit Administrativ, por në kushtet kur gjyqtarët janë nën presionin e Vetting, kur kemi deklaratat e Kryeministrit dhe Kryebashkiakut që i cilëson gjyqtarët si KÇK, duke ushtruar presione publike, vështirë se mund të merret një vendim i drejtë.
Lidhur me Korporatën e Investimeve, avokati i njohur theksoi se është krejtësisht e paqartë se si objektivat që parashikohen në ligjin e miratuar do të zbërthehen në realitet duke u shndërruar në politikën tregtare të një shoqërie tregtare shtetërore.
Po aq e paqartë është edhe se si ka mundësi që e njëjta politikë qeverisëse që ka nxitur më shumë se kurrë partneritetin publik privat dhe konçesionin në të gjitha format e tij e sheh nxitjen e zhvillimit ekonomik në vitin e saj të gjashtë nëpërmjet një shoqërie tregtare me kapital shtetëror, tha ai.
Në vijim, avokati theksoi se fakti që ky ligj nuk ka qenë i parashikuar në programin e përgjithshëm analitik të projektakteve të Ministrisë së Financave dhe Ekonomisë për vitin 2019 tregon më së miri që është një nga ato ligje që edhe pse është iniciuar nga Këshilli i Ministrave shoqërohet nga një qëllim jo kaq parimor sa duket në objektivat e vetë ligjit.
Referuar krijimit të ‘Illyrian Guard’, një polici private, me aksioner të vetëm Ministrinë e Brendshme, avokati i njohur sqaroi se ligji për Policinë e Shtetit, parashikon që policia mund të ofrojë edhe shërbime për subjekte të treta, pra jo vetëm për shtetin.
Në këtë kuadër ai shtoi, por Qeveria ka krijuar një polici private, që nuk parashikohet fare në ligj, kanë bërë një polici private përmes një VKM me aksioner të vetëm Ministrisë së Brendshme.
“Tarifat janë gati dyfishi me të cilat operojnë institucionet me policitë private. Policitë private do të shkojnë drejt falimentit, pasi do të jetë policia private, me aksioner të vetëm Ministrinë e Brendshme, që do të ruajë institucionet.
Të gjithë punonjësit e policisë që sot ruajnë institucionet do të duhet të shkojnë te policia private dhe nuk do të marrin më pagat e sotme, por 33 mijë lekë në muaj dhe marrëdhëniet e tyre do të rregullohen në bazë të Kodit të Punës.
Po kështu, nuk do të zbatohet ligji për prokurorimin publik, por do të zbatohet duke favorizuar këtë shoqëri tregtare”, tha Braho.
Sipas tij, nuk mund ti jepet prioritet shtetit në një ekonomi tregu, për sipërmarrje që ushtrohen edhe nga privati.
“Shteti po vendos monopolin në të gjithë institucionet shtetërore. Por në momentin që me një VKM cënohet ligji për policinë e shtetit dhe Kushtetuta, atëherë do të ketë kosto, që do të bien mbi shtetin.
Nuk mundet që me një vendim të qeverisë të ndërpresësh të gjitha kontratat dhe t’i marrë ato një shoqëri shtetërore.
Fatura financiare i shkon shtetit, pasi të gjitha policitë private që do të godasin këtë vendim ligjërisht do të marrin fitimin e munguar.
Po kështu edhe policët që do të kalojnë në rradhët e policisë private, kanë të drejtën të kërkojnë dëmshpërblimin financiar”, tha Braho.
