Nga Boldnews.al
Këshilli i Rregullit të Territorit, i drejtuar nga Kryeministri Edi Rama, ka vendosur së fundmi që të “shpërblejë” me të tjera leje ndërtimore disa prej biznesmenëve të fuqishëm të vendit, të cilët konsiderohen edhe si “oligarkët” e Qeverisë.
Në mbledhjen e zhvilluar këtë të premte (25.10), Këshilli i Rregullimit të Territorit ka vendosur të pajisë me le ndërtimore për kulla, komplekse turistike e magazina Agim Zeqon, Vilma Nushin, Ilir Trebickën, e të tjerë.
“Boldnews.al” po paraqet më poshtë të gjithë lejet që kanë përfituar këtë fundjavë “oligarkët” e Edi Ramës.
– Leje Ndërtimi për objektin: “Godinë polifunksionale “City Hotel”, me vendndodhje në rrugën Brigada VIII, Bashkia Tiranë”, me zhvillues Z. Agim Zeqo. Biznesmeni Zeqo, i njohur edhe si “Gimi i Redbullit” pritet të ndërtojë këtë godinë në zemër të ish-Bllokut.
– Leje Ndërtimi për objektin: “Godinë polifunksionale, me vendndodhje në rrugën “Mine Peza”, Tiranë”, me zhvillues shoqërinë “Nova Construction 2012” sh.p.k. godina e re pritet të ndërtohet në një territor shumë pranë qendrës së Tiranës.
Kompania drejtohet nga Ilir Shtufi dhe Kujtim Shtufi. “Nova Construction” është duke ndërtuar aktualisht një godinë polifunksionale në territorin, ku më parë gjendej Muzeu i Shkencave të Natyrës, pranë zonën se “21 Dhjetorit” në Tiranë
– Bosja e “Check Up”, Vilma Nushi, është pajisur me leje për ndryshim projekti gjatë ndërtimit për objektin: “Vepër industriale magazinë”, me vendndodhje në Njësinë Administrative Kashar, Bashkia Tiranë. Sipas lejes, subjekti zhvillues “Marketing & Distribution” sh.p.k., kompani e cila është në pronësi të Vilma Nushit.
– Biznesmeni nga Berati, Kreshnik Merko, ka përfituar një leje ndërtimi në zonën përballë fakultetit të Histori-Filologjisë, në hyrje të Parkut të Madh të Tiranës.
Sipas vendimit të KRRT, është miratuar leje Ndërtimi për objektin: “Godinë polifunksionale “Lion Residence”, me vendndodhje në Rrugën e Elbasanit, Bashkia Tiranë”, me zhvillues shoqërinë “Lion Construction” sh.p.k., e cila kontrollohet nga “Ante-group”, ku Kreshnik Merko ka shumicën e aksioneve.
Ndërtuesi i njohur për lidhjet e afërta me Partinë Socialiste, Ilir Trebicka, si edhe ndërtuesit e kompleksit ‘Perla” në Gjirin e Lalëzit, kanë siguruar lejen për ndërtimin e dy resorteve të ndryshëm, një në Himarë dhe tjetri në Durrës.
Këshilli i Rregullimit të Territorit ka miratuar leje ndërtimi për objektin: “Kompleksi turistik “Thymos”, Dhërmi, Bashkia Himarë”, me zhvillues Z. Ilir Trebicka.
KRRT ka miratuar gjithashtu shtyrjen e afatit të Lejes së Ndërtimit për objektin: “Ndërtimin e Resortit Turistik “Perla”, në Komunën Ishëm, Qarku Durrës, me zhvillues shoqërinë “PerlaS12” sh.p.k.
Një leje Ndërtimi për “Kompleks turistik” ka përfituar edhe kompania “Primera”, e drejtuar nga biznesmenia Karolina Janina. Ky kompleks pritet të ndërtohet në Sarandë.
Në fund, KRRT e drejtuar nga Edi Rama ka pajisur me leje për ndërtim depozitash edhe biznesmenin e fuqishëm të naftës, Piro Bare. Në vendimet e zbardhura, rezulton se KRT miratoi Leje Ndërtimi për objektin: “Terminali Depozitues, përpunues për hidrokarburet e lëngshme dhe nënproduktet e tyre, me vendndodhje në Porto Romano, Durrës”,me zhvillues shoqërinë “AV International Group” sh.a., në pronësi të Piro Bare.
