Një 47-vjeçar dhe partnerja e tij janë vënë në pranga nga policia e Vlorës pasi akuzohen se kishin përshtatur lokalin e marrë me qera për përdorim dhe tregtim kokainë.
“Mbi bazën e informacioneve të marra në rrugë operative, Seksioni për Hetimin e Trafiqeve dhe Narkotikëve ka bërë kapjen dhe arrestimin e shtetasve: A. Sh., 47 vjeç dhe E. T., 30 vjeçe, me banim në Vlorë. Shërbimet e Policisë, gjatë kontrollit të ushtruar në lokalin nën administrimin e këtyre shtetasve, kanë gjetur dhe sekuestruar një sasi lënde narkotike prej 14 gr., e dyshuar kokainë. Gjithashtu, nga veprimet e mëtejshme ka rezultuar se aktiviteti në lokal ushtrohej me mungesë dokumentacioni”, njoftoi policia.
Materialet iu referuan Prokurorisë, në ngarkim të këtyre shtetasve për veprat penale “Prodhimi dhe shitja e narkotikëve” kryer në bashkëpunim, “Përshtatja e lokalit për përdorim droge” dhe “Fshehja e të ardhurave”, shtuan të njëjtat burime.
