Kryetari i PD-së, Lulzim Basha, ka reaguar sërisht në rrjetet sociale ndaj Kryeministrit Edi Rama, lidhur me dështimin e qeverisë Rama në hapjen e negociatave me BE-në.
Basha i është përgjigjur reagimeve të Ramës, me deklaratat e Presidentit të Francës, Emmanuel Macron, kancelares gjermane, Angela Merkel, ministres së Jashtme të Finlandës dhe Kryeministrit të Holandës.
Më parë Rama kishte publikuar thëniet e disa prej zyrtarëve në largim të Komisionit Europian dhe PE-së, që nuk bënin përgjegjëse qeverinë shqiptare lidhur me dështimin në hapjen e negociatave.
“Megjithë lojërat e Ramës për tu fshehur pas propagandës, të gjithë e shohin me sy të vërtetën. Ai dështoi të na afrojë me Europën, siç dështoi të përmirësojë ekonominë dhe të luftojë korrupsionin.
Shqipëria e meriton hapjen e negociatave. Shqiptarët meritojnë më të mirën.
Për fat të keq ka një njeri që e pengon këtë rrugë. Europa e refuzoi, tani është koha ta refuzojnë shqiptarët”, shkruan Basha në rrjet.
