Nga Boldnews.al
Dy kryeministrat e Shqipërisë dhe Maqedonisë së Veriut ikën në Bruksel për të marrë negociatat, në kthimin duarbosh, kryeministri Edi Rama rendi për një koferencë shtypi bashkë me kanakarin e tij të vogël Gent Cakaj, ku fajin ja la Europës, ndërsa kryeministri Zaev me një letër të shkruar, dha dorëheqjen dhe e çoi vendin në zgjedhje të parakohëshme.
Ky është ndryshimi mes një politikani që mendon për shtetin dhe tjetrit që ka lidhur jetën me pushtetin, duke mos e lëshuar edhe në kulmin e çdo dështimi, brenda dhe jashtë vendit.
“Ne jemi përgjegjës dhe kjo kërkon nga ne vendim serioz, secili politikan duhet të jetë përgjegjës, dal me përgjegjësi para qytetarëve. Ëndrra evropiane e Maqedonisë nuk do të shuhet. Për këtë marr përgjegjësi, organizojmë zgjedhje të parakohshme parlamentare”, deklaroi kryeministri maqedonas Zaev.
Nga ana tjetër, kryeministri Rama në çdo fjali përmendte se vetë ai dhe qeveria që drejton nuk kishin asnjë përgjegjësi, ndërsa faji ishte i Francës, Holandës apo Danimarkës. Por ndërsa dështimi për tu integruar në BE mban firmën e kryeqeveritarit tonë, ditët e errëta të një kryeministri shëtitës po vijnë gjithnjë në rritje. Sot Shqipëria për nga standardet politike nuk përngjason as me Kosovën apo Maqedoninë e Veriut.
Në Bruksel u tha qartë: Shqipëria nuk plotëson kushtet për shkak të emigracionit ilegal, shtimit të kërkesave për azil, krimit të organizuar që eksportohet nga Shqipëria, korrupsionit qeveritar dhe mungesës së zgjedhjeve të lira dhe ndershme.
Kjo ishte damka që Rama e mori në kthim nga Brukseli, por ende po mbahet me dhëmbë ngulur pas karriges së brejtuar kryeministrore. Është i gatshëm të djegë vendin për pushtetin personal, të shpopullojë Shqipërinë në ikjet pa kthim të mijëra të rinjve të pashpresë. Vetëm një fije e hollë e ndan nga diktatura e mirëfilltë, ku i ka mbetur pa realizuar vetëm hapjen e burgjeve politike dhe krijimit të komisionit të internim dëbimeve, për ata që nuk mendojnë si Rilindas.
E sot Shqipëria nuk kërkon më ti përngjajë Europës, pasi jemi shekuj larg për nga ekonomia, mendësia politike, funksionimi i demokracisë apo liritë themelore të njeriut. Duam më së paku ti përngjajmë Kosovës dhe Maqedonisë së Veriut, këto dy vende që i kemi pranë dhe krijuam edhe iluzionin masiv se ishim më lart se ata në shtebërje, demokraci apo ekonomi.
Një shtet i krijuar në vitin 2008 pas një lufte të tmerrshme Kosova realizoi zgjedhje të lira dhe ndershme, duke dhënë shembuj demokracie për pushtetarët e Tiranës, që mbahen fort pas grupeve kriminale. Në Kosovë kryeministri Ramush Haradinaj dha dorëheqjen pasi u thirr nga Gjykata për Krime Lufte. Shkoi atje si qytetar dhe jo si pushtetar, ndërsa vendin e çoi në zgjedhje të parakohshme. Në fund rezultati u pranua nga të gjithë në një proces të rregullt dhe demokratik, ku rezultati i zgjedhjeve doli vetëm pesë orë pasi ishin mbyllur kutitë e votimit.
Nga ana tjetër, Maqedonia e Veriut na lë pas, na bën karshillëk me formën demokratike që zgjodhi pas një dështimi për marrjen e negociatave Kreu i qeverisë Zoran Zaev dha manjëherë dorëheqjen dhe e çoi vendin në zgjedhje të parakohshme. Sot vendi po qan për fatin e tij, në një moment ku apatia masive është gërshëtuar fort me pesimizëm dhe mjafton vetëm një shkëndijë që revolta popullore të shpërthejë, fundi i së cilës nuk dihet, pasi Rama ka treguar më shumë se një herë që për atë karrige pushteti është gati të sakrifikojë një popull.
