“Një gabim historik, i cili shpresoj se mund të korrigjohet sa më shpejt”, e cilësoi Federica Mogherini, shefja në largim për politikën e Jashtme të BE, mos-hapjen e negociatave me Shqipërinë dhe Maqedoninë e Veriut.
“Dy vendime të rëndësishme dhe një gabim historik”, shkruan Mogherini në rrjetet sociale, referuar vendimeve të marra nga Këshilli Europian në takimin e mbajtur më 17-18 tetor.
“Krerët e Shteteve dhe Qeveritë kanë shtyrë vendimin për hapjen e negociatave për hyrjen e Shqipërisë dhe Maqedonisë se Veriut në Bashkimin Evropian, përkundër përparimit të jashtëzakonshëm të bërë nga të dy vendet dhe kundër mendimit të Komisioni Evropian. Ishte shumë më tepër sesa një mundësi e humbur: është një gabim historik, i cili shpresoj se mund të korrigjohet sa më shpejt.
Këshilli mori dy vendime të rëndësishme: miratoi marrëveshjen e re me qeverinë e Londrës për daljen e Britanisë së Madhe nga Bashkimi Evropian; dhe konfirmoi vendimet që kishim marrë të hënën me ministrat e jashtëm për ndërhyrjen ushtarake të Turqisë në Siri.
Përgjigja jonë ndaj sulmit të Ankarasë ndaj kurdëve sirianë ishte e fortë dhe e bashkuar.
Jo vetëm që kemi dënuar ndërhyrjen, por kemi vendosur që shtetet anëtare do të ndalojnë shitjen e armëve në Turqi – secila në përputhje me legjislacionin e tyre kombëtar – dhe ne kemi miratuar sanksione ekonomike në përgjigje të veprimtarive turke jashtë bregdetit të Qipros”, shkruan Mogherini.
Federica Mogherini ka mbajtur funksionin e shefes së diplomacisë së BE-së për 4 vjet dhe ka qenë një ndër burokratet e Brukselit që ka mbështetur qeverinë Rama, edhe në momentet më kritike të saj, përfshi këtu edhe kanabizimin e vendit.
