Dorëhiqet ambasadori Gent Gazheli, pas akuzave se braktisi fëmijën në Siri

Ambasadori i Shqipërisë në Turqi, Gent Gazheli, raportohet se ka dhënë dorëheqjen, pas publikimit në emisionin “Le Iene” mbi braktisjen e një fëmije shqiptar, në një prej kampeve në Siri.

Bëhet fjalë për Alvin Berisha, i cili ndodhet në Siri, dhe sipas mediave ai u la në mëshirën e fatit në kampin ku ndodhej.

Kryeministri Edi Rama, i cili gjithashtu zyrtarisht mban edhe funksionin e ministrit të Jashtëm, reagoi publikisht mbi ngjarjen, ndërsa e cilësoi si mjaft komplekse atë.

Ndërkohë, referuar burimeve qeveritare, Syri.net, raporton se Gaxheli i ka paraqitur dorëheqjen Edi Ramës prej 3 ditësh.

“Jemi këtu në përfundim të gjithë kësaj odiseje për të ndarë të gjithë sëbashku lidhur me mos konsolidimin për të cilin jemi përpjekur të gjithë. Por përpara se të hyj në temën e Këshillit Evropian dëshiroj të ndaj me të gjithë, lidhur me një shqetësim që e kam marrë nga qytetarët, mbi një emision të mbrëmshëm të RAI-t.

Për fat të keq ai emision drithërues ka lënë të kuptohet se çështja e djalit të mitur është thjesht një çështje e ambasadorit dhe kjo është e pavërtetë. Prej disa kohësh kam nxjerrë një urdhër, është material i klasifikuar që s’mund ta ndajmë me publikun.

LEXO EDHE  ONM kërkon shkarkimin e prokurorit Gjon Kodra

Në bashkëpunim me partnerët amerikanë ne kemi zhvilluar një proces të tërë identifikimi, disponojmë të dhëna mbi identitetin e shumë personave.

Tërheqja e tyre nga ato kampe nuk bëhet me ambasada dhe ambasadorë, aksesi është tejet i komplikuar dhe kërkon një komunikim me partnerët, kemi punuar intensiuvisht, kemi plan të tërë për të rakorduar me partnerët tanë kryesorë, ka një sërë grupesh të përfshira në këtë proces, dua t’ju them që po të ishte një çështje ambasadash dhe ambasadorësh, do të ishin tërhequr individët atje sidomos gratë dhe fëmijët, por nuk është kaq e thjeshtë”, tha Rama dy ditë më parë, lidhur me çështjen e fëmijës Alvin Berisha.