Kreu demokrat Lulzim Basha hodhi akuza të forta në drejtim të Qeverisë, ndërsa tha se me paratë e drogës janë blerë prokuroritë, Parlamenti, pra kanë blerë vendimmarrjen politike dhe sot po blejnë ekonominë.
Basha tha se 20 % e shqiptarëve ushqehen me lista, 47 % e tyre nuk kanë para të ngrohin shtëpitë në dimër dhe 90 % e tyre i harxhojnë të ardhurat vetëm për t’u ushqyer.
Kreu demokrat tha se largimi i shqiptarëve nuk mund të ndalet duke vendosur policët e FRONTEX, pasi askush nuk do të rrijë më në një vend që nuk është më i tij, që institucionet nuk janë të shqiptarëve por të një grushti njerëzish, pashallarëve të Edi Ramës, gjysma kriminelë dhe gjysma tjetër oligarkë.
“Ky është fillimi i fundit të tmerrshëm. Ne na pret një e ardhme shumë e mirë në bashkëpunim me gjermanët e Bundestagut, aleatët tanë europianë dhe amerikanë”, tha Basha.
Ndërsa ironizoi Kryeministrin Edi Rama për mjekrën, që të duket si Ismail Qemali, Basha tha se “ai kërkon të duket se Ismaili, por në fakt ka dorëzuar sovranitetin e vendit, duke ruajtur kufirin me policë europianë, sepse nuk ka mundësi të kontrollojë largimin masiv të shqiptarëve”.
Kreu demokrat tha se nuk shkohet në Europë me propogandë dhe Toyota Yaris, as me grabitje dhe pabarazi para ligjit.
“Demokracia dhe barazia para ligjit janë dy shtyllat kryesore. Licensat dhe lejet janë vetëm për oligarkët, pashallarët e rinj të një sistemi të vjetër, kjo është mënyra që zgjedhin për të qeverisur vendin autokratët”, tha Basha.
Sipas tij, reforma në drejtësi dhe zbatimi i saj sipas Kushtetutës, ka vetëm një qëllim: t’i trajtojë të gjithë njësoj.
