Kryeministri Edi Rama thotë se vështirësitë e Shqipërisë për t’u bashkuar me Bashkimin Evropian lidhet edhe me të shkuarën e saj, duke përmendur komunizmin por madje edhe Perandorinë Osmane.
Gjatë konferencës, u pyet se kur të rinjtë shqiptarë të kishin të njëjtat të drejta si bashkëmoshatarët e tyre në Evropë, duke premtuar se të rinjtë e kësaj gjenerate do të mund të votonin për Parlamentin Evropian, por pa dhënë një përgjigje se kur do të ndodhte ky anëtarësim.
“Në kohën kur unë kam dalë në rrugë për të kërkuar Shqipërinë si gjithë Evropa i kisha të gjitha flokët dhe kam përshtypjen se nëse do t’ia lërë mjekrës ta dëshmojë mund të bëhet më e gjatë se flokët e tua. Përtej kësaj, ky është një rrugëtim dhe Shqipëria është shumë më evropiane që kurse ke lindur ti. Mos harroni që trashëgimia jonë është shumë e rëndë.
Ne nuk jemi as Hungaria, as Polonia, as Çekia. Kemi pasur dy ndërprerje të mëdha, njëra mbi 500 vjet, e dyta mbi 50 vjet. Kjo është e treta e vërteta. Një gjë është e sigurt që ti do të votosh për Parlamentin Evropian në Shqipëri. Se kur ende nuk e di, por kjo është e sigurt. Me siguri këtë e di Nard Ndoka por kur të bëni konferencë shtypi me opozitën, kërkojani si do të jetë Bashkimi Evropian.
Mbase mund ta quani Bashkimi Evropian i juglindjes, por nuk është kundërpërgjigje dhe as alternativë e rrugës evropiane, është pjesë e saj. Është fati jonë që jetojmë në mes të një kontinenti”, theksoi Rama.
Duke i ndalur tek azilkërkuesit, Rama tha se shqiptarët shkojnë në Francë pasi ky vend ka procedura më të ngadalta.
“Shqiptarët është e vërtetë janë në një numër më të madh por jo ndonjë numër që po trondit Francën. Pse nuk janë në Gjermani? Pse në Gjermani azilkërkuesit shqiptarët kanë rënë në mënyrë drastike? Për arsye se Gjermania kur ky problem u paraqit ishte ndryshimi i regjimit dhe e spostoi në Francë që duhet një vit që të marrësh përgjigje. Këta njerëz, që unë jo nuk i gjykoj, por mendoj se nuk gjykohen dhe ky është një fenomen nuk luftohet duke ia kërkuar qeverisë shqiptare.
Ato bishtat që dëgjoni nëpër konferencat e sotme janë për ata atje. E patë Presidentin e Francës që tha si tua them francezëve? E tha në frëngjisht dhe francezët e dëgjuan”, shtoi ai.
