Nga Boldnews.al
Franca u konfirmua në samitin e djeshëm të ministrave të jashtëm të BE-së në Luksemburg, si kundërshtare e fortë e hapjes së negociatave me Shqipërinë dhe Maqedoninë e Veriut. Megjithatë, raportohet se ekziston një skenar, realizimi i të cilit mund ti kthejë mendjen Presidentit francez Emanuel Makron.
Në një artikull të publikuar këtë të mërkurë, “EURACTIV”, media e specializuar në raportimet lidhur me politikat e BE-së, hedh hipotezën e një përplasje me Parisit dhe Berlinit për çështjen e negociatave me Shqipërinë dhe Maqedoninë e Veriut.
Në Berlin, një zyrtar qeveritar tha se hapja e bisedimeve të pranimit ishte një përparësi për Gjermaninë, e cila do të mbajë samitin e saj vjetor me Francën të Mërkurën.
“Kancelarja Angel Merkel do të shtrojë çështjen me Macron të Mërkurën,” tha zyrtari, duke shtuar se ajo gjithashtu do të ngrejë çështjen në samitin me të gjithë 28 liderët në Bruksel të enjten dhe të premten. “Është një… pyetje strategjike për BE”.
Një burim konfidencial tha se Franca mund të ndryshojë pozicionin e saj në samit vetëm në skenarin hipotetik të një “tregtie të madhe”, siç është ajo e pranimit nga Gjermania të ideve të Francës për reformën e Eurozonës, raporton “EURACTIV”.
Macron tashmë është duke menduar për zgjedhjet presidenciale të vitit 2022. Ai gjithashtu është në ankth për të mos provokuar Rusinë, e cila nuk është e kënaqur nga hyrja në BE e territoreve ku ka mbajtur një ndikim, siç janë Serbia, Mali i Zi dhe Maqedonia e Veriut. Mali i Zi është anëtarësuar në NATO. Maqedonia shpreson të jetë e ardhshme në fillim të vitit 2020, ndërsa Serbia nuk ka plan të anëtarësohet në aleancën e Atlantikut.
Shumica e vendeve të tjera të BE treguan zhgënjimin me pozicionin francez, në samitin e djeshëm të Luksemburgut.
Hapja e bisedimeve është një moment historik i rëndësishëm, por procesi i negociatave zgjat disa vjet dhe vendet anëtare mund të përdorin veton e tyre në rast se vendi kandidat nuk do të zbatojë reformat dhe angazhimet.
Konsideratat gjeopolitike
Shumë vende besojnë se hapja e negociatave të pranimit me Maqedoninë e Veriut dhe Shqipërinë është me rëndësi të madhe, duke pasur parasysh situatën e vështirë gjeopolitike.
“A do të destabilizohej qeveria reformiste e Zoran Zaevit nga një ‘jo’ e BE? Kjo mund të sillte përfitim vetëm për opozitën VMRO-DPMNE, e cila mund të joshet të kërkojë afrimin me Rusinë në vend të Europës. Në rastin e Shqipërisë, ndjenja e refuzimit mund të forconte forcat me plane të tjera, siç është krijimi i një Shqipërie të Madhe”, raporton “Euroactiv”.
Mbështetësit më të fortë të zgjerimit të ardhshëm të BE-së janë anëtarët e rinj të inionit.
Bullgaria ka ende çështje me Maqedoninë e Veriut në lidhje me interpretimin e historisë së fundit, por Sofia vendosi të mbështesë Shkupin në këtë fazë dhe të përdorë veton e saj nëse vendi fqinj vendos të ndalojë dorëzimin e një traktati dypalësh që synon zgjidhjen e çështjeve.
“Është shumë e rëndësishme të japësh një sinjal politik se zgjerimi nuk ka vdekur,” tha George Ciamba, ministri i Rumanisë për BE-në.
