Nga Boldnews.al
Takimi mes ministrave të jashtëm të vendeve të BE-së u mbyll dje pa një kompromis për çështjen e hapjes së negociatave me Shqipërinë dhe Maqedoninë e Veriut. Në një artikull të publikuar këtë të mërkurë, “EURACTIV”, media e specializuar në raportimet lidhur me politikat e BE-së, hedh dritë mbi rolin qendror të Francës për të mos hapur negociatat për dy vendet.
Maqedonia 1 kundërshtar, Shqipëria 3
Takimi, i fundit nën komisionin Juncker, vjen pas atij të qershorit, kur ishte vendosur që marrja e vendimit për negociatat për të dy vendet të shtyhej për në tetor. Raportohet se vetëm Franca bllokoi Maqedoninë e Veriut, ndërsa Holanda dhe Danimarka mbështetën Shkupin, por kundërshtuan ofertën e Tiranës. Finlanda propozoi që çështja e Shqipërisë të ndahej nga ajo e Maqedonisë së Veriut, por Franca nuk u pajtua.
Ministrja e Jashtme finlandez Tytti Tuppurainen, vendi i të cilit mban presidencën e radhës të BE, tha pas mbledhjes se në mungesë të marrëveshjes, çështja ishte hedhur në axhendën e samitit.
Udhëheqësit e BE do të mblidhen në Bruksel të enjten dhe të premten me një axhendë të vështirë: si të shmangin një “Brex-it” të vështirë dhe të gjejnë përgjigjen ndaj inkursionit turk në Siri.
Problem “rrjedhja e trurit”
Ministrja franceze e çështjeve evropiane, Amélie de Montchalin tha se vendi i saj ishte kundër hapjes së bisedimeve të pranimit për dy vendet e Ballkanit Perëndimor. Ajo sqaroi se duhen më shumë reforma në të dy vendet, por gjithashtu e bëri të qartë se duhej adresuar çështje më të mëdha, përfshirë një reformë të thellë të mënyrës se si Komisioni zhvillon negociatat, dhe adresimin e çështjes së “ikjes së trurit” në dy vendet.
“Rrjedhja e trurit është me të vërtetë një problem, por çështja nuk është adresuar në rastin e procesit me Serbinë dhe Malin e Zi”, raporton “EURACTIV”.
De Montchalin tha që kjo kishte të bënte me “besueshmërinë“: “kriteret janë caktuar në vitin 2018 dhe këto duhet të respektohen”, këmbënguli ajo.
Në rastin e Maqedonisë së Veriut, ajo specifikoi reformën e prokurorisë speciale, e cila siç u shpreh, nuk ka përfunduar.
Kritikët e pozicionit francez thonë se është BE që humbet besueshmërinë, veçanërisht duke mos dhënë premtime të bëra për Maqedoninë e Veriut në lidhje me marrëveshjen historike të Prespës.
Në Paris, një zyrtar i presidencës franceze tha se qeveria e Macron nuk do të pajtohej të hapte bisedimet tani.
“Këto vende do të jenë pjesë e Bashkimit Evropian një ditë … por është shumë herët për të hapur procesin ligjor drejt zgjerimit,” tha zyrtari.
Sot takimi Makron-Merkel/ Plani që mund ti kthejë mendjen Presidentit Francez për negociatat
