Gjyqtari i Korçës Markelian Kuqo ka reaguar pas alarmit për bombë në makinën e tij.
Kuqo thotë se telefonata anonime i ka ardhur nga ‘grushti kriminel i atdheut’, ndërsa shton se nuk ka nevojë për mbrojtje pasi diçka të tillë e ka kërkuar nga gazetarët.
“Telefonata erdhi nga grushti kriminel i Atdheut tim. Nuk kam asnjë lloj dijenie. Jam i qetë, nuk kam asnjë problem. Nuk kam nevojë për mbrojtje, mbrojtjen e dua nga gazetarët”, ka thënë gjyqtari në një prononcim për mediat.
Alarmi për bombë është dhënë nga një telefonatë anonime në adresë të vetë gjyqtarit, e cila dyshohet se është kryer nga burgu i Drenovës. Pas verifikimeve, policia zbuloi se alarmi ishte fals.
“Nga një telefonatë, jemi njoftuar se në lagjen nr.3, pranë Gjykatës së Shkallës së Parë Korçë, në mjetin tip ‘Benz’, në pronësi të gjyqtarit M.K, i cili ndodhej i parkuar në garazhin e Gjykatës, ishte vendosur një sasi lënde e dyshuar plasëse. Menjëherë në vendngjarje, shkuan shërbimet policore të cilat bënë rrethimin dhe sigurimin e zonës. Pas verifikimit dhe veprimeve të kryera nga Njësia Antieksploziv, në mjet nuk u konstatua sasi plasëse. Grupi Hetimor nën drejtimin e Prokurorisë, po kryen veprimet e mëtejshme proceduriale dhe po punon për identifikimin dhe kapjen e autorit, i cili ka kryer njoftim të rremë në organet e rendit”, thuhet në njoftimin e policisë.
Gjytari Kuqo vendosi pak kohë më parë lirimin e të fortit të Tiranës, Gert Gjinarari, i cili ishte dënuar për vrasjen e Naim Zyberit. I çuditshëm dhe i dyshimtë është konsideruar vendimi i trupës gjyqësore të drejtuar nga Kuqo, për faktin se është ndaluar gjykimi i shkurtuar për dënime me burgim të përjetshëm.
Në muajin janar të këtij viti, gjykatësi Markelian Kuqo u bë objekt i emisionit investigativ ‘Fiks Fare’ për “dhënie dy herë gabim të të njëjtit vendim’”
