Gjykata ka ndryshuar masën e sigurisë për tre banorë të ‘Unazës së Re’ në kryeqytet, të arrestuar në datë 11 Tetor për bllokimin e rrugës gjatë protestës në zonën e ‘Unazës’, një ditë më parë. Ata janë liruar nga qelia duke vijuar betejën me drejtësinë në masën detyrim paraqitje. Prokurori Bledar Maksuti kërkoi që banorët të qëndronin në burg. Kërkesa u pranua nga gjykatësi Arben Micko.
Pas vendimit, avokati Jordan Daci këkoi ndryshimin e masës së sigurisë dhe lirimin e tyre nga qelia. Gjykata pranoi kërkesën dhe gjyqtarja Rexhina Memlika vendosi masën e detyrim paraqitjes.
Pas përfundimit të seancës, avokati, në një komunikim me mediat u shpreh se vendimi për ndryshimin e masës ishte i drejtë, pasi mungonin provat për t’i mbajtur në burg banorët.
“Ishte një vendim i drejtë, pasi mungojnë provat.Ka nevojë për një hetim për vetë hetimin për të shkuar në këtë situatë. Por kush ishin provat? Bëhej fjalë për video të transmetuara, që as vetë prokurori nuk e dinte. Materialet nuk plotësonin kriteret që të cilësoheshin prova” tha ai. Ndërkohë që nëntë protestuesit e arrestuar mbrëmë dhe ish-deputeti i PD Klevis Balliu do të dalin para gjykatës për masën e sigurisë, ditën e mërkurë.
Ish-deputeti dhe 9 protestuesit u arrestuan mbrëmjen e djeshme, fill pas protestës te “Unaza” për veprat penale: për veprat penale “Organizimi, pjesëmarrja, grumbullimi dhe manifestime të paligjshme”, “Pengimi i qarkullimit të mjeteve të transportit”, “Prishje e rendit dhe qetësisë publike, “Kundërshtimi i punonjësit të policisë së rendit publik” dhe “Mosbindja ndaj urdhrit të punonjësit të policisë së rendit publik”.
Opozita i quajti arrestimet politike, me urdhër të kryeministrit Edi Rama dhe dënoi projektin rreth 40 mln euro, për rikonstruktimin e rrugës nga sheshi “Shqiponja” te mbikalimi pranë “pallatit me shigjeta”. Projekti parashikon shembjen e banesave të banorëve të “Unazës” dhe për të kundështuar këtë, ata kanë reth një vit që protestojnë thuajse çdo pasdite. Banorët kanë kërkuar edhe negociata me qeverinë qendrore e lokale në mënyrë që dëmshpërblimi i tyre, nëse shemben banesat, të jetë me vlerat e tregut. Por, as me këtë kërkesë, nuk është pajtuar qeveria.
