Kreu demokrat Lulzim Basha mësohet se ka zhvilluar një takim gjatë ditës së sotme me juristë dhe ekspertë zgjedhorë pranë PD-së, ku i ka kërkuar hartimin e një dokumenti që do t’i japë zgjidhje problematikës së zgjedhjeve në Shqipëri.
Burime nga PD theksojnë se opozita e bashkuar pritet të paraqesë një draft me propozimeve pranë ndërkombëtarëve lidhur me reformën zgjedhore, përfshi edhe ndryshimin e sistemit zgjedhor.
Por gjithashtu demokratët do të propozojnë ndryshimet kushtetuese , me synim balancimin e kontrollit kushtetuese.
Mësohet se në draftin e opozitës do të përfshihen jo vetëm rekomandimet e OSBE/ODIHR, por të gjitha problemet e evidentuara në të paktën dy zgjedhjet e fundit, si dhe ato që kanë të bëjnë me financimin e partive dhe fushatat elektorale.
Partia Demokratike dhe aleatët e saj paraqitën një dokument me 5 pika, por që duket se do të përpunohet dhe do të kalohet në një draft, ku përfshihen çështjet që sipas opozitës duhet ndërhyrë dhe propozimet e saj për zgjidhjen e problemeve zgjedhore.
Vëmendja kryesore do të përqëndrohet në parandalimin e fenomenit të shit-blerjes së votave, ndërhyrjen në proces të strukturave shtetërore dhe presioneve që ushtrohen nga pushteti ndaj votuesve.
Mësohet se drafti me propozime do t’i dorëzohet përfaqësive ndërkombëtare, por jo vetëm. Burime nga opozita theksojnë se nuk është hequr dorë nga idea për një komision të monitoruar tërësisht nga ndërkombëtarët, me 1 përfaqësues nga Kuvendi, që do t’i përkasë Rilindjes, dhe një përfaqësues nga opozita e bashkuar.
