Mazhoranca shprehet se reforma zgjedhore të zhvillohet në dy faza. E para është implementimi i rekomandimeve të OSBE/ODHIR, kurse e dyta, siç është shprehur më herët dhe kryeministra Edi Rama “lidhet me sistemin, me të tjera ide dhe sugjerime”. Ndërkohë, nga “opozita e re” pretendohet që ndryshimet ligjore të kalojnë vetëm me një fazë, gjatë së cilës do vendoset dhe ndryshimi i sistemit zgjedhor.
Qasja e mazhorancës u artikulua edhe nga Damian Gjiknuri, drejtuesi i tryezës së reformës zgjedhore. Pas mbledhjes me dyer të mbyllura, ai tha: “Shqipëria ka disa prioritete që lidhen me negociatat. Ne kemi vullnetin për ta parë çështjen e sistemit. Por komisioni filloi ta trajtojë çështjen dhe javë pas jave do të miratojmë paketa”. Gjiknuri konfirmoi mosdakortësinë e opozitës së re: “Jo nuk janë dakord, insistojnë për çështjen e sistemit zgjedhor”.
Edhe Rudina Hajdari, bashkë-kryetare e reformës zgjedhore, tha se nuk do të jepet vota për ndryshimet ligjore, nëse mazhoranca nuk bie dakort për ndryshim sistemi.
“S’do ketë reformë me dy faza por tërësore, do merremi me rekomandimet, por s’na ndalon njeri të diskutojmë për rekomandimet dhe për diskutimet, por kur të vijë momenti për ti miratuar, do ti miratojmë bashkëshkrisht”, tha ajo.
Opozita
Opozita nuk ka marrë pjesë në tryezën e sotme. Opozita ka paraqitur më herët një plan me 5 pika kryesore për reformën zgjedhore dhe i ka bërë thirrje kryeministrit Edi Rama ta zbatojë ose “të hapë krahun”. Ndërkohë, mazhoranca duket se nuk i marrë parasysh. “PD nuk ka sjellë propozime, në çdo draft që do të diskutojmë natyrshëm edhe ata kanë të drejtë të bëjnë propozime si shoqëria civile, komente dhe vërejtje”, tha Gjiknuri.
Mos-bashkëpunimin me opozitën për reformën zgjedhore e ka artikuluar edhe kryeministri Edi Rama. Duke i mëshuar idesë së ndarjes së reformës në dy faza, Rama, në një deklaratë pak kohë më parë, u shpreh: “Për pjesën e parë nuk ka nevojë për opozitën jashtë parlamentare dhe nuk besoj se opozita jashtë parlamentare është kundër, se ato janë rekomandime të shkruara e bardhë mbi të zezë, s’kemi ça diskutojmë, siç mund të diskutojmë të tjera aspekte që lidhen me sistemin, me të tjera ide dhe sugjerime”.
