Kryeministri Edi Rama tha se reforma zgjedhore do të zhvillohet në dy hapa dhe eliminoi opozitën në plotësimin e të parit: ndryshimet zgjedhore bazuar në rekomandimet e OSBE/ODHIR.
Shefi i ekzekutivit, në një intervistë transmetuar në faqen e tij në Facebook, la të kuptohet se nuk do pranojë ndërmjetës ndërkombëtarë në bisedime me opozitën lidhur me reformën zgjedhore, një nga kushtet e Gjermanisë për çeljen e negociatave. “Strukturë ndërkombëtare, ndërmjetës ndërkombëtar, dhe përkthyer në gjuhë të huaj për tu marrë vesh mes shqiptareve unë për veten time nuk kam për të pranuar asnjëherë”, tha Rama.
“Na duhet të përshpejtojmë procesin e reformës bazuar në rekomandimet e OSBE/ ODHIR dhe ne do ecim me këto. Duhet të përmbushim sa më parë këtë kusht për Shqipërinë europiane për të pasur datën e konferencës së parë mes Shqipërisë dhe liderëve të BE-së që është hapi i parë për formalizmin e çeljes së negociatave, procesin do e përshpejtojmë dhe do e ndajmë në dy pjesë. Përmbushja e këtij kushti dhe garantimi i një ligji që ka brenda rekomandimet e ODHIR është pjesa e parë dhe pjesa e dytë ti japim kohë vetes që të diskutojmë gjithë aspektet e tjera. Do dëgjoj me respekt të gjithë kontributet, të gjitha idetë. Ne jemi partia e shumicës, kemi dhe ne idetë tona, kemi dhe ne kontributet tona, kontribute për të dhënë përtej tyre. Por në raport me BE duhen këto dhe në raport me zgjedhjet e ardhshme këto janë të domosdoshme. Pjesa tjetër është madje e domosdoshme për një parti apo për një tjetër, por nuk është gjëja më e domosdoshme. Edhe ne kemi një ide që do ta çojmë deri në fund, që është vota e shqiptarëve jashtë Shqipërisë dhe duam që ata të votojnë në zgjedhjet e ardhshme, por kjo i mbetet pjesës së dytë të procesit para zgjedhjeve të ardhshme që janë në 2021. Për ne është prioritet i prioriteteve kalimi i të gjitha ndryshimeve në ligjin zgjedhor që kanë brenda të gjitha rekomandimin e OSBE/ODHIR. Për këtë do duhet armonizim dhe me ODHIR dhe me partnerët, ndërkohë që strukturë ndërkombëtare, ndërmjetës ndërkombëtar, dhe përkthyer në gjuhë të huaj për tu marrë vesh mes shqiptareve unë për veten time nuk kam për të pranuar asnjëherë”, u shpreh kryeministri.
Do e kaloni dhe nëse opozita jo parlamentare do jetë pjesë e tryezës?
Pyetjes iu përgjigj: “Për pjesën e parë nuk ka nevojë për opozitën jashtë parlamentare dhe nuk besoj se opozita jashtë parlamentare është kundër, se ato janë rekomandime të shkruara e bardhë mbi të zezë, s’kemi ça diskutojmë, siç mund të diskutojmë të tjera aspekte që lidhen me sistemin, me të tjera ide dhe sugjerime. Dhe kjo i duhet Shqipërisë tani”.
Këtë të mërkurë, u organizua tryeza për reformën zgjedhore e thirrur nga OSBE. Përfaqësuesi i opozitës, Ivi Kaso prezantoi propozimin e opozitës së bashkuar për realizimin e reformës zgjedhore duke thënë se procesi duhet ndjekur nga një strukturë e përbërë nga përfaqësues të organizmave ndërkombëtarë, një përfaqësues i PS dhe një i opozitës së bashkuar. Pas kësaj deklaratë, Ivi Kaso u largua nga tryeza.
