Kryeministrat e Shqipërisë dhe Maqedonisë së Veriut, Edi Rama dhe Zoran Zaev, mbërritën në Beograd pasditen e sotme.
Ato u takuan në aeroportin “Nikolla Tesla” nga ministrja e Integrimit Evropian Jadranka Joksimovic.
Të dy kryeministrat do të marrin pjesë në një takim trepalësh me ftesë dhe iniciativë të Presidentit serb Aleksandar Vuçiç, i cili do të mbahet nesër në Novi Sad.
Temë kryesore e takimit do të jetë propozimi i tij për krijimin e një “Shengeni të vogël”, me qëllim integrimin më të mirë të tregjeve në rajon dhe heqjen e pengesave për biznesin dhe rrjedhën e lirë të mallrave dhe njerëzve në territorin e tre vendeve, raportojnë mediat serbe.
Marrëveshja është kundërshtuar vazhdimisht nga Kosova, e cila është e lënë jashtë saj, pasi e konsideron atë si një rikthim të ish-Jugosllavisë, edhe pse kjo është një nismë e mbështetur nga institucionet europiane që e shohin si një fazë të ndërmjetme para integrimit europian të shteteve të Ballkanit Perëndimor.
