Nga Klodian Tomorri
Pas rrotës, shpikjen e dytë më të madhe të njerëzimit e ka bërë qeveria shqiptare. Një mendje brilante brenda qeverisë, ka vendosur që sherbimi ndaj tatimpaguesve t’i hiqet Administratës Tatimore dhe të kalojë tek Adisa.
Çmendurinë e kanë bërë me vendim qeverie. Kjo është njësoj sikur urgjencën mjekësore ta kalosh nën varësine e Ministrisë së Bujqësise, ngjitur me seksionin e domate-kastravecave.
Ne çdo vend të zhvilluar, por edhe në vendet në zhvillim kati i parë i selisë së administratës tatimore është shërbimi ndaj tatimpaguesit. Madje, Internal Revenue Service, administrata tatimore e Shteteve të Bashkuara Amerikane e ka misonin bazë të saj shërbimin ndaj tatimpaguesve. Nuk ka mbledhjen e të ardhurave, por t’u shërbejë qytetarëve dhe bizneseve amerikane.
Dhe kështu duhet të jetë. Qëllimi dhe misioni i një administrate fiskale nuk është të realizoje plane, por t’i shërbejë tatimpaguesve, pra qytetarëve dhe biznesit që të jenë në rregull me ligjin. Ky eshte kontributi më i çmuar i një administrate sepse duke qenë në rregull tatimpaguesit me ligjin, financohen shërbimet publike dhe shoqëria bëhet më e drejtë.
Por një reformator brilant në qeveri ka vendosur që administrata fiskale nuk duhet t’u shërbejë qytetarëve, por shërbimi të merret në sportelet e Adises, njësoj si radhët e qumështit qëmoti. Imagjinoni pak, një biznes i cili ka një pyetje për Tatimet, duhet të shkojë të zërë radhën në sportel dhe të pyesë sportelisten e Adises. Kjo e fundit do e përcjellë pyetjen tek Tatimet. Më pas Tatimet do t’i përgjigjen Adises dhe pas gjithë kesaj çmendurie, qytetari mund të ketë shpresën të marrë ndonjë përgjigje.
Ky është shkallmim i administratës tatimore në themel. Kjo është çmenduri që mund të bëhet vetëm në kushtet e injorancës së thellë fiskale. Cilido ekspert që ka njohuritë me minimale të sistemit dhe administratës fiskale nuk do e pranonte kurrë një gjë të tillë.
Kthejeni shërbimin ndaj tatimpaguesve tek Administrata Tatimore, mos bëni eksperimente injorance. Në vend që të rregullojnë gjërat e mbrapshta, shkojnë e prishin ato pak që janë në rregull. Çmenduri.
