Një ditë pas dorëheqjes nga detyra e drejtueses së Kadastrës së Vlorës të Elona Hodajt, në krye të këtij institucioni është komanduar Taulant Canameti, i cili mbante postin e nëndrejtorit.
Në Kadastrën e Vlorës, tre drejtorë kanë dhënë dorëheqjen brenda një muaji. Pikërisht regjistrimi i një prone në Jalë që duket se mban peng ecurinë e të gjithë punës së këtij institucioni. Me një vendim të Gjykatës së Lartë, prona në fjalë duhet të bllokohet e të mos vijojnë procedurat e shitjes apo blerjes, ndërsa më herët Gjykata e Apelit të Vlorës kishte vendosur vijimin e këtyre procedurave.
Për rastin e fundit të dorëheqjes, drejtoresha tashmë e dorëhequr, Elona Hodaj, dhe nëndrejtori, Taulant Canameti, kanë pasur përplasje mes tyre pasi kanë dhënë dy vendime të kundërta mbi pronën. Canameti, sipas burimeve, firmosi bllokimin për pronën në bregdet duke zbatuar vendimin e Gjykatës së Lartë, ndërsa Elona Hodaj e anuloi firmën e Canametit me argumentin se nuk e kishte autorizuar.
Një ditë më parë, në Prokurorinë e Vlorës u depozitua një padi ndaj 12 personave lidhur me çështjen në fjalë. Mes të paditurve ishte edhe Taulant Canameti. Për të avokati i kallëzuesit tha se ka marrë një vendim të paligjshëm.
Ai tha se Taulant Canameti është një hallkë e zinxhirit të personave që në mënyrë të jashtëligjshme janë angazhuar që pronën e paditësit ta zaptojë në mënyrë të paligjshme biznesmeni Alban Xhillari.
“Vendimi i pezullimit dhe përplasja që mendoj unë të jetë i drejtoreshës së dorëhequr sot është se për çudi na ka ardhur nëndrejtor Taulant Canameti, drejtor i Agjencisë Shtetërore të Kadastrës Vlorë, i cili vjen me tetë bodigardë në Vlorë. I keni pamje të filmuara. Pra një nëpunës shteti, me një rrogë 400 mijë lekë të vjetra, vjen me 8 bodigardë në Vlore dhe gjen mundësinë kur drejtoresha para dy-tre ditësh qenë në Tiranë, merr një vendim të jashtëligjshëm. Ne për këtë jemi drejtuar me kallëzim penal edhe për zotin Taulant për shpërdorim detyre i cili ka bërë një urdhër të paligjshëm”, deklaroi ai.
