Ambasadorët e 28 vendeve të BE-së kanë nisur diskutimet mbi çështjen e zgjerimit të BE-së, ku në datat 17-18 tetor, pritet një vendim nëse do të hapen negociatat me Shqipërinë dhe Maqedoninë e Veriut.
Sikundër mësohet përfaqësuesi i Francës ka hedhur një propozim konkret lidhur me çeljen e negociatave. Franca kërkon të ndryshojë procesi i zgjerimit të BE-së përmes një dokumenti konkret që diskuton edhe çeljen e negociatave.
Aktualisht pozicioni i Shqipërisë mbetet në pikëpyetje për shkak të qëndrimit të Holandës, Francës dhe Gjermanisë. Berlini dhe Parisi kanë një qëndrim të kushtëzuar ndaj Shqipërisë, ndërsa Holanda anon nga një “JO” e fortë.
Franca dhe Holanda mbeten ndër vendet skeptike në rastin e Shqipërisë, ndërsa Gjermania përmes një rezolute të Bundestagut kërkon plotësimin e 9 kushteve nga institucionet shqiptare, duke kushtëzuar procesin e çeljes së negociatave.
Holanda, përmes ministrit të Jashtëm, e konsideron hapjen e negociatave me Shqipërinë jo në kohën e duhur.
Holanda ka ngritur shqetësimet për krimin e organizuar, trafikun e drogës dhe korrupsionin, ndërsa Franca ka si shqetësim kryesor kërkesat e larta për azil nga qytetarët shqiptarë, që prej vitesh kryesojnë numrin e kërkesave në Francë.
Franca ka propozuar një po me kushte për hapjen e negociatave me Shqipërinë, por që kjo të ndodhë vitin e ardhshëm.
Ndërkohë duket se Maqedonia e Veriut e ka më të thjeshtë marrjen e një “PO” nga BE për hapjen e negociatave, sidomos pas arritjes së marrëveshjes me Greqinë për çështjen e emrit.
