Vetëvendosja dhe LDK nuk kanë një martesë të vështirë, pasi prej 18 muajsh kemi pasur një bashkëpunim shumë të mirë opozitar.
Kështu u shpreh kreu i Vetëvendosjes, Albin Kurti, në një intervistë për emisionin “Opinion”.
Kurti tha se në bazë të vendimit të Gjykatës Kushtetuese të Kosovës ka vetëm një rrugë që kryeministri t’i takoje VV-së, ose vendi shkon në zgjedhje të parakohshme.
“Vendimi i Kushtetueses e përcakton qartë, Kryeministri i takon partisë fituese, pra VV-së dhe Kryeministri i ri do të jem unë”, tha Albin Kurti.
Kreu i VV-së ka paralajmëruar zhvillimin e një takimi me Vjosa Osmanin dhe Isa Mustafën.
“Vjosa Osmani do të jetë në qeverisje, ndërsa Mustafa është kryetar i LDK-së, kështu e kanë zgjedhur ato.
Ne nuk do të bëjmë ndarje feudesh dhe klanesh në koalicionin qeveritar. Ndaj do të vendosim disa kritere dhe kushtesh se kush do të jenë pjesë e kabinetit qeveritar. Më e rëndësishme është që të jenë të pastër, mos kenë akuza.
Nëse nesër një ministri i shfaqen akuzat ai duhet të ikë, dorëhiqet ose shkarkohet. Nëse nuk ikën, e heq unë. Ne duhet të luftojmë krimin dhe korrupsionin, duam të ndërtojmë shtetin e së drejtës, ndaj dhe duhet të vendosim disa principe”, tha Kurti.
