Përplasjet brenda Rilindës sa vijnë dhe bëhen më të forta. Ish-ministri i jashtëm i qeverisë së Ramës, Ditmir Bushati, ndërsa ka komentuar zgjedhjet në Kosovë dhe ka uruar fituesit, ka dhënë dhe një mesazh të fortë për Rilindasit.
Sipas Bushatit Kosova i dha një mesazh të fortë Shqipërisë se si bëhen zgjedhjet, ndërsa ka sulmuar Ramën duke i treguar se zgjedhjet janë garë njerëzish me vlera dhe jo të fortësh siç e kthyen Rilindasit.
Reagimi i plotë i Ditmir Bushatit në Facebook:
Erdhi dita, beso!
Kosova përqafoi ndryshimin. Sovrani i dha një mandat të qartë Albin Kurtit dhe Lëvizjes VETËVENDOSJA (duke e renditur atë të parin), dhe Vjosa Osmanit të LDK.
Albini dhe Vjosa i dhanë oksigjen Kosovës në opozitë duke demonstruar konsistencë e pathyeshmëri e duke mos u bërë palë me veset e jetës politike që dobësojnë idealin e jetës demokratike.
Është kjo arsyeja që sot ato shihen si projekt shprese për të gjithë shqiptarët në rajon, duke na dëshmuar se mund të triumfohet mbi rrënojat e së vjetrës.
Tanimë Albini dhe Vjosa janë përpara një përgjegjësie historike për ta drejtuar Kosovën me dinjitet, dashuri e përkushtim drejt sfidave të shtet konsolidimit demokratik dhe partneritetit me botën demokratike.
Ata kanë përgjegjësinë për të jetësuar besimin e qytetarëve të Kosovës duke sjellë një standard të ri qeverisës shumë të dëshiruar për gjeneratën e Kosovës Evropiane, që e sheh të ardhmen e saj brenda vendit.
Përtej fitores së Albinit dhe Vjosës, në Kosovë, mbi të gjitha, fitoi standardi dhe kultura demokratike. Procesi zgjedhor, bazuar në një sistem që kombinon disiplinën partiake me mundësinë që ka çdo qytetar për të renditur kandidatët për deputetë sipas preferencës së tij, sikundër mënyra, korrektesa dhe shpejtësia me të cilën u numërua vota e qytetarëve, ishte një leksion më vete për ne.
Kosova, një dekadë shtet, na dha mësime të vlefshme, edhe pse ne e kemi lënë pas një shekull shtet. Në demokraci zgjedhjet janë garë vlerash dhe jo të fortësh. Partitë politike i nënshtrohen konfirmimit të vendimeve nga populli, ku qytetarët kanë mundësi të rendisin të preferuarit e tyre në listat e kandidatëve për deputetë, çka forcon kontrollin demokratik ndaj vendimmarrjes.
Urime Albin! Urime Vjosa! Urime Kosova!
Erdhi dita, beso!
