Nga Boldnews.al
Trupa e prokurorëve është thirrur paraditen e sotme për të plotësuar vakancën në Këshillin e Lartë të Prokurorisë, pas shkarkimit nga strukturat e Vetingut të Gentian Osmanit.
Në garën për vendin vakant është prokurori i Krimeve të Rënda, Vladimir Mara dhe prokurorja e Dibrës, Esmeralda Cami (Keshi).
Të dy prokurorët kanë lidhje indirekte me një prej hetimeve më të rëndësishme të kohëve të fundit, por edhe më të keqadministruara nga institucioni i Prokurorisë-dosja 184.
Esmeralda Cami (Keshi) është familjare me Arben Keshin, personin që, siç rezultoi nga përgjimet e publikuara nga “Bild” ishte koordinatori kryesor në operacionin për të siguruar, me çdo mënyrë e formë, fitoren e Partisë Socialiste në zgjedhjet lokale të vitit 2016.
Në përgjimet e dosjes 184, Arben Keshi shfaqet si ndërlidhës mes zyrtarëve të lartë qeveritarë, përfshirë kryeministrit Edi Rama e ministrit të Infrastrukturës së asaj kohe, Damian Gjiknuri, me zyrtarët lokalë e “çunat problematikë”.
Kandidati tjetër, Vladimir Mara, është kunat i Sali Skurës, shef i Komisariatit të Policisë nr.5 në Tiranë.
Në përgjimet e “Bild”, Skura shfaqet i angazhuar për të bllokuar mjetet e dibranëve rezidentë të përkohshëm në Kamëz, të cilët do të udhëtonin drejt Dibrës për të votuar në zgjedhjet e pjesshme lokale të vitit 2016.
Të dy prokurorët, Cami e Mara, janë konfirmuar së fundmi nga strukturat e Vetingut.
Vladimir Mara konkuroi për Strukturën e Posaçme-SPAK, por nuk arriti të merrte besimin e Këshillit të Lartë të Prokurorisë. Tashmë, synon të jetë pjesë e asaj strukture që nuk e kualifikoi për në SPAK.
Esmeralda Cami (Keshi) ishte deri para pak ditësh drejtuese e Prokurorisë së Dibrës. Ajo dha dorëheqjen nga pozicioni drejtues për të qenë e lirë për të garuar për vendin vakant në Këshillin e Lartë të Prokurorisë.
DENONCO